Весела школ пагыт

Тӱҥалтыш класслаште тунемме годым кугурак тунемше-влак дечын лӱдынна: нуно мыланна тугай кугу чучыныт, а эше осал улыт манын шоненна. Кузе тыгай шонымаш шочын? Школыш кошташ тӱҥалме жап шыже лавырам ушештара. Вашталтен чияш пеленна вес йолчиемым нумалынна. Тунам мемнан ялыште асфальт уке ыле, школыш миен шумеш, коварче марте лавырген пыталтын. А школыш йолчиемым вашталтен пурыман. Кугурак класслаште тунемше дежурный-влак омса воктене, ыресла ыштен, швабрым кучен шогат ыле. Кӧн «кокымшо» йолчиемже лийын огыл, тудым мӧҥгӧ колтеныт. Ик-кок гана мыламат мӧҥгӧ пӧртылаш логале. 

2000-ше ийлаште брюкым чийымаш модыш пурыш. Меат кугурак класслаште брюкым «йӧраташ» тӱҥална. Класс вуйлатышына, марий йылмым туныктышо Михаил Михайлович Андриянов урок тӱҥалме деч ончыч ӱдыр-влакым поче-поче кынелтен шогалта да брюкым чийыше-влаклан «Шич, ик арня дежуритлет» манеш ыле. Тыге ӱдыр-влаклан кажне кечын урок деч вара доскам, пуракым ӱшташ, кӱварым мушкаш логалын, а рвезе-влак шуэнрак дежуритленыт. 

Шымше классыште тунемме годым Виталий Кутлуметович Кугубаевын историй урокышто мыланем журналыш «кокытаным» шындымыжымат шарналтем. Историйысе дата-влакым наизусть тунемына ыле. Садлан южо датым, йодыт гын, кызытат каласен кертам. 

Физкультур урок эн веселан эртен. Сентябрьыште тунемаш тӱҥалмек, вигак шыже кроссыш луктыт ыле. Юрий Айгузинович Айгузин стартым пуа: «На старт! Внимание, марш!» «Марш» мутшым туге кычкыралеш, лӱдмет дене шиждеак куржаш тӱҥалат. 

Математика урокат пеш оҥай чучын. Кажне урокышто, доска дек лектын, задачым але примерым решатленна. Ямдылалт мийыдыме-влак южгунам урок мучко доска ончылно шогеныт.

Вот тыгай весела школ пагыт.  А тендан ушеш могай оҥай историй-влак кодыныт, возыза.