«Салам, Шошо!»

Кугарнян игечыже йӱштырак лийын гынат, февраль кече шыргыж ончымыж дене ял калыкланат, толшо уна-влакланат весела кумылым сӧрен. Телым ужаташ толшо кажне еҥын чонжым куан тул ырыктен. Кужу жап вучымо шошым вашлийме пайремым муро, куштымаш, модмаш, тамле сий сӧрастареныт. Корак ӱдырамаш-влак толшо кажне унам шокшо чай дене сийленыт. Ӱстелыште пайремын ик тӱҥ кочкышыжлан - тувыртышлан - посна верым ойырымо.  Ял калык шокшо чайым верысе шым памаш гыч налме вӱд дене шолтен. Теве памаш-влакын лӱмышт: «Изи памаш», «Курас памаш», «Арслан памаш», «Аялче памаш», «Айвий памаш», «Осып памаш», «Аплакай памаш». Шокшо чай дене мелнам тамлен ончаш кумылан-влак ятыр лийыныт. 

«Айык ял» республикысе конкурсын муниципальный йыжыҥыштыже Мишкан районышто ты лӱмым Корак ял сулен налын. Пайремышкышт тыгаяк лӱмым Калтаса районышто сеҥен налше Кугу Тогыний одо ял гыч уна-влакым ӱжыныт. «Марзан» одо фольклор ансамбль марла такмак-влакым да одо йылме дене кок сылне мурым пӧлеклен. «Мемнан репертуарыштына тӱҥ шотышто одо муро-влак улыт, но ме марла, татарла да рушла муро-влакымат мурена, - ойла коллективым вуйлатыше Ольга Диязова. -  Ме шуко калык илыман республикыште илена, сандене кажне калыкын мурыжым мураш тыршена».

Корак-влакым саламлаш Ирсай гыч «Чолга шӱдыр» мурышо ансамбль толын. Тыгак Нерге ял гыч толшо «Ӱжара» мурышо калык ансамбль куандарен. 

Верысе «Рвезылык» ансамбль пайрем мучко еҥ-влакым веселитлен. Игече йӱштырак лийын. Тыгай годым ик верыште шып шоген концертым ончаш огеш лий. Йол шкеак тавалташ тӱҥалеш. 

Корак-влакын ямдылыме пайрем программышт пеш поян лийын. Пайремым эртарыме олыкышто тӱрлӧ модмаш, спорт таҥасымаш-влак эртеныт. Уна-влак уло кумылын ялын турист картыжым онченыт. Тудым Корак клубын методистше Диана Николаева ямдылен. Тиде карт мо дене ойыртемалтеш? Тушто ялыште илыше эмлызе-влакын суртышт, кумалме ото, памаш-влак ончыкталтыныт. Тиде пайрем деч икмыняр кече ончыч гына ялыште краеведений музейым почмо.  Кумылан-влак тушко экскурсий дене миеныт.

Телым ужатыме, Шошым вашлийме пайремым мучашлыме годым Кувавай (Зинаида Янгубаева) ден Кочай (Владислав Мурадымов) поро тыланымашым ойленыт. Телым ужатеныт. Мучашлан «Кандырам» куштеныт. Тудын кужытшо 250 метрыш шуйнен. Тиде куштымаш эртыше да кызытсе жап, кугурак ден самырык тукым кокласе вашкылым ончыкта.