Лӱдыкшӧ, ойыртемалтше арвер, еҥ-влак деч шекланыза. Умылаш лийдыме томаша нерген правоохранительный органын пашаеҥже-влаклан шижтарыза;
Палыдыме еҥ-влак деч нимогай пакетым, сумкам ида нал, шке багаждамат шинча ончыч ида кораҥде;
Кажне ешын чрезвычайный ситуацийыште шкем кузе кучымо шотышто планже лийшаш; ешысе кажне еҥын телефон номерже, электрон почтын адресше лийман. Экстренный ситуаций годым икте-весе дене пырля вашлияшлан ончылгоч верым палемдыза;
Эвакуаций годым пелен документым да эн чот кӱлешан арверым налза;
Пӧлем, зданий гыч лекме ешартыш вер-влакым палыза;
Пӧртысӧ подвалыш, пӧрткоклаш логалаш ынже лий манын, тушко пурымо вер-влакым петырыман (опечататлыман). Суртышто домофоным йӧнештарыман. Шуко пачашан пӧртыштӧ тошкалтышыште, коридорлаште корным авырыше арвер-влак лийшаш огытыл.
Илыме пӧрт воктене палыдыме еҥ тошкештмым, палыдыме автомобиль толын чарнымым, мешак, яшлык-влакым ястарымым шекланыман.
Пожар, землетрясений лийме, иктаж-мо пудештме годым лифт дене пайдаланыман огыл.
Кеч-мо лийын гынат, утыждене азапланыме, пуламырым тарватыме ок кӱл.
Палыдыме лӱдыкшӧ арвер-влак утларакшым транспортышто, пачер омса воктене, пачаш-влак кокласе тошкалтышыште, тӱрлӧ учрежденийлаште, общественный верлаште вашлиялтыт. Нуным верештме годым мом ыштыман?
Иктаж арвер тыште верланышаш огыл гай чучеш гын, уждымыла эртен ида кай;
Общественный транспортышто монден кодымо але озадыме арверым верештында гын, йырысе еҥ-влак деч йодыштса, тудым кӧ монден коден кертмым рашемдыза. Озаже пале огыл гын, тыманмеш водительлан увертарыза;
Палыдыме арверым илыме подъездыштыда вашлийында гын, пошкудо-влак деч йодыштса - ала тудым лач нуно монден коденыт. Озаже уке гын, тидын нерген полиций пӧлкаш шижтарыза;
Озадыме арверым учрежденийыште мумо годым охранылан але администрацийлан каласыза;
Нине случай-влак годым палыдыме арверым ида логал, ида поч, вер гыч верыш ида кусаркале;
Тудым верештме жапым палемдыза;
Тыгай арвер деке калык ынже лишем, мӱндыркырак кораҥже манын азапланыза;
Правоохранительный орган пашаеҥ-влакын толмыштым вучыза;
Шарныза: арверын тӱжвал сынже ондален кертеш. Пудешт кертше устройствым, палаш ынже лий манын, чӱчкыдынак тыглай пакетыш, сумкаш, коробкыш, модыш кӧргыш вераҥдат.
Ава-ача-влак, те йочан илышыже, тазалыкшылан вуйын шогеда, мутым кучеда. Йоча-влаклан уремыште, подъездыште мумо тӱрлӧ палыдыме арвер лӱдыкшӧ лийын кертеш манын умыландарыман.
Палыдыме арвер дене шкевуя нимомат ида ыште: тудо пудешт кертше устройство гын, ятыр еҥын илышыжым наҥгаен, йырысе кумдыкым локтылын, икманаш, кугу эҥгекыш шуктен кертеш.