Лӱдыкшыдымылык йодышлан кугу тӱткылыкым ойырат

Тушто лишыл жапыште республикыште лийшаш  Юниор-влак коклаште спорт кучедалмаш дене тӱнямбал первенствыште да «Самырык профессионал-влак» (WorldSkills Russia) национальный чемпионатын финалыштыже лӱдыкшыдымылык йодышлан кугу тӱткылыкым ойырымо нерген мутланеныт, увертара БР Правительствын пресс-службыжо. 

«11-23 августлан палемдыме Спорт кучедалмаш дене тӱнямбал первенствыш 65 эл гыч 1500 спортсмен, 25 августышто «Самырык профессионал-влак» национальный чемпионатын финалышкыже 3 тӱжем наре участник толшаш. А сентябрьыште, уло элысе семынак, Россий Федерацийын Кугыжаныш Думышкыжо депутат-влакым сайлымаш лиеш, - каласен Радий Хабиров. - Нимогай лӱдыкшӧ ынже лий манын, нине мероприятий-влакым эртарыме верлам йӱдшӧ-кечыже оролыман, чыла санитарно-эпидемиологический нормым шуктыман». 

Башкортостанын спорт министрже Руслан Хабибов да Внешнеэкономический кыл да конгресс паша шотышто кугыжаныш комитетым вуйлатышын алмаштышыже Лена Изотова тӱшка спорт-мер мероприятийлан ямдылалт шуктымо нерген каласкаленыт.

Республикысе Рӱдӧ избирательный комиссийын председательже Илона Макаренко 17-19 сентябрь кечылаште РФ Кугыжаныш Думыш сайлымашым эртарыме годым 3364 избирательный участок пашам ышташ тӱҥалме да шукыштыжо стационарный металлодетектор рамкым шындыме але шындышаш, моло вере кидеш кучымо металлодетектор-влак дене пайдаланыме нерген ойлен.