Тылын полышыж деч посна - нигузе!

Нурей сельский поселенийыште - Еммет, Изимка, Нурей, Янахмат, Кызыл-Чулпан  яллаште илыше-влакат ик автофургон арверым ямдыленыт. Нуно чоҥымо материалым, тӱрлӧ инструментым, специальный оборудованийым, автомашиналан кок аккумуляторым, окоплык сорта-влакым, шокшо вургемым да молым, а поро кумылан еҥ-влак госпитальлан кум мешак да кок коробка кӱлешан арверым, посна еҥ-влаклан посылкым (чылаже 27 коробка) погеныт. Еммет ял гыч предприниматель Алексей Атнагузин дронлан FPV-мониторым, Нурей ял гыч фермер Азат Галиуллин кок комплект портативный рацийым налыныт, Еммет гыч предприниматель Геннадий Саитов кумшо гана, Изимка ялыште илыше сельский поселенийын депутатше Рустам Шаймухаметов кокымшо гана гумконвой дене пырля ик машина пиломатериалым (оҥам) колтеныт. Ӱдырамаш-влак «Салтаклан мӧҥгысӧ лашка» акцийыш ушненыт. Йӧремлашкам Емметыште «Родничок» йочасадыште, Нурейыште клубышто, Янахматыште школышто пӱчкеден ямдыленыт. Ложашым сельский поселенийын депутатше М.А. Булатов пуэн. Посылка-влакым ялласе кевытлаште погеныт, кӧ мо дене кертын, туге полшен.

«Еммет, Изимка, Нурей, Янахмат, Кызыл-Чулпан яллаште илыше калыклан, предприниматель-влаклан, кевытыште ужалыше ӱдырамаш-влаклан чолгалыкым ончыктымыштлан кугу тау! Мемнан боецна-влаклан вий-куатым, чытышым тыланем, чылаштымат Юмо аралыже», - манеш Нурей сельский поселений вуйлатыше, тиде пашалан вуйын шогышо О.И. Атнагузина.