Кажне еҥ фронтлан пайдам конден кертеш

Акпарсыштат У ий вашеш салтак-влаклан гуманитарный полышым погышна. Школ коллектив, тыгак Акпарс, Усола да Шалтык ял калык, оксам поген, районысо специальный счетыш колтышт. 

Ме, ял калык, гуманитарный полышым школышто чумырышна. Тиде поро пашам шукташ директор мыланна ик пӧлемым ойырыш, Г.Ф. Габдрахмановалан кугу тау.  Арняш кок гана погынышна. Тидын шотышто ялысе еҥ-влак моткоч молодец улыт - школышко толыт, мо кӱлешым шкеак кондедат. Салтак-влаклан тушто куштылго огыл. Жапыштыже кочкашыштат огеш логал, ночкым, йӱштым чытат, черланат. 

Ме тушенкым, консервым, кужу жап аралыме тӱрлӧ кочкышым, У ийлан тамле конфет ден печеньым, шокшо носким, перчаткым, шокшо йолашым, шовычым, мушкылташ кучылтмо арверым, вареньым, матрушка ден вӱршудо гыч ямдылыме шудо чайым да шуко молым колтышна.

Тыштак салтак-влаклан окопысо сортам ышташ ятыр калай банкым погышна, картоным пӱчкедышна, парафиным шуко нална, тыге рвезе-влаклан 60 наре окопысо сортам ямдылышна. Маскировка сетьым пидаш Шаран селаш мийышна. СВО-ш чылаже 17 именной посылкым поген колтышна, нунын коклаште офицерна-влакымат ышна мондо. Кажне посылка кӧргыш поро тыланымашан серышым пыштышна, йоча-влакат землякыштлан серышым возышт.

Таче тӱрлӧ верыште тыгай полышым пуат, сайлан ӱшанен илат. Тыгай поро пашаш ушнен, кажне еҥ фронтлан пайдам конден кертеш. Тидлан кумыл гына лийже!