Изиж годымак врач лияш шонен

Рвезе тыршен тунемын, училищыште моло студент-влак дене пырля мер пашаланат жапым муын. 2000-ше ийыште медучилищым «йошкар» диплом дене тунем лектын да вигак Башкир мединститутын эмлыме факультетышкыже тунемаш пурен. Кумшо курс деч вара Самарысе военно-медицинский институтыш куснен. Тунеммыж годым оласе больницыште пашам ыштен, опытым поген. Институтым старший лейтенант званий дене тунем лектын.

Рвезым Йошкар-Олашке стратегический назначениян ракетный войскаш пашаш колтеныт. Капитан И. Ахтареев тушто вич ий пашам ыштен, но чонжо эре шочмо-кушмо верыш пӧртылаш ӱжын. Тыге тудо Шаран больницыште терапевтлан ышташ тӱҥалын. Туштак УЗИ врачлан да рентгенологланат тыршен.

2022 ий 27 сентябрьыште Ильям СВО-ш мобилизоватленыт. «Мый мотострелковый частьыште служитлем, медицина пунктым вуйлатем. Тӱҥ сомылем - икымше полышым пуаш, сусыргышо-влакым лӱмын ыштыме медицина отрядыш транспортироватлаш», - ойла тудо.

И.В. Ахтареевым Россий Федерацийысе Оборона министерствын «За укрепление боевого содружества» медальже да Генерал Шаймуратовын медальже дене наградитленыт.

«Ме тушто землякна-влак дене кылым кучен, икте-весылан полшен илена. Кызытсе салтак йӧсылык деч лӱдшаш огыл, пеҥгыде дисциплинан, тале, патыр лийшаш. Мый сар нерген историй учебник гыч паленам, но шкежат тушко логалам манын шонен омыл. Вучыза, ме сеҥен пӧртылына», - ойла Илья Владимирович.

Тудым мӧҥгыштыжӧ аваж ден ачаже, ватыже да кок эргыже вучат. Мыят Ильялан таза-эсен пӧртыл толаш тыланен кодам.

Автор: И. Акурбаева.