Контрактник-влакым погымо «Защитник» пункт нерген мом палыман

Тудо молан кӱлеш?

Кызыт контрактым ышташ кумылан-влак медкомиссийым шкевуя эртат, анализ-влакым сдатлат, тӱрлӧ кӱлешан справкым погат. Чыла тиде икмыняр кече жапым налеш. Рӱдерыште чылажымат ик верыште ышташ лиеш: военкоматын пашаеҥже-влак документ-влакым ончат да йодышлан вашештат, врач-влак анализым налыт да кандидат-влакын тазалыкыштым шымлат, банк пашаеҥ-влак писын гына «Мир» банк картым пуат (Тушко единовременно тӱлымӧ да моло окса мия).

Тиде рӱдер гыч еҥ-влак тӱшка дене службым эртыме верлаш каят.

Пунктыш кӧ миен кертеш?  

Рӱдерыш контракт почеш военный службым эрташ да СВО кайыме верлаш каяш ямде улшо 18 гыч 65 ияш марте пӧръеҥ-влакым налыт.  

Мый Башкирийыште ом иле, миен кертам?

Да, кертыда. Башкирийысе прописка обязательный огыл. Пунктыш еҥ-влак Российын кеч-могай регионжо гыч, тыгак йот элын гражданже-влак миен кертыт.   

Пелен могай документым налман?

Тиде паспорт, военный билет, еш положений, образований нерген документ, СНИЛС, ИНН.  

Кузе миен шуаш?

«Защитник» рӱдер «Черемушки» санаторийыште верланен. Тудын адресше: Уфа ола, Элеваторный урем, 15-ше пӧрт (тиде олаш кечывалвелым пурымаште, Мелькомбинат районышто). Тушко шкевуя машина дене, общественный транспорт дене «Озерная» остановка марте, вара йолын 3,5 километрым але, военкоматыш, тыгак илыме вер почеш администрацийыште рашемден, пырля тӱшка дене мияш лиеш. Рӱдерыш кеч-могай жапыште мияш да верланаш лиеш, паша кече 8 шагат эрдене тӱҥалеш.   

Медосмотр кузе эрта?

Медкомиссийым эрташлан санаторийын кудывечыштыже мобильный медицина комплекс-влакым вераҥдыме. Тушто анализ-влаклан биологический материалым налаш, рентгенографийым да флюорографийым ышташ йӧн уло. «Контрактым ыштыме деч ончыч нине шымлымашым кажне кандидат эртышаш. Анализ-влакын результатышт кум-ныл шагатыште ямде лиеш. Тылеч вара веле тудлан тӱрлӧ специалист - терапевт, врач-окулист, лор-врач, невролог, психиатр, дерматолог, хирург да стоматолог - деке приемыш мияш направленийым пуат. Врач-влак айдемым ончышаш да военный службылан йӧрышӧ але йӧрдымӧ улмыжым палаш шкеныштын заключенийыштым пуышаш улыт. Нине шымлымаш-влак негызеш военно-врачебный комиссийын председательже (тиде мый) иктешлыше заключенийым ышта», - ойла БР Военный комиссариатын военно-врачебный экспертиза рӱдержым вуйлатыше Арсланбек Муталипов. 

Илыме вер шотышто кузерак?

Пунктыш иканаште 100 утла еҥ миен кертеш. Кандидат-влаклан йӱдым мален лекташ «Защитник» рӱдерыште кроватян икмыняр пӧлем уло. Контрактник лияш шонышо-влаклан кечеш кум гана шокшо кочкышым пукшат. Тидлан оксам тӱлыман огыл, чылажат тугок. 

Башкирий деч контрактник-влаклан мом сӧрат?

Тиде кечылаште южо муниципалитет-влак Оборона министерство дене контрактым ыштыше-влаклан тӱлымӧ единовременный оксам 400 тӱжем теҥге марте кугемденыт. Тидым шотыш налын, чыла тӱлымӧ оксан чумыр кугытшо 3 825 000 теҥгеш шуэш. Тылеч посна мемнан сарзе-влаклан да нунын ешыштлан 40 утла тӱрлӧ льгота уло, тиде санаторийлаш тугок путевка, южо налогым тӱлыдымаш, йоча-влаклан тӱрыснек тугок образований, ешыштлан сурт-озанлыкыште полыш да молат. 

Йодыш уло гын, кушто рашемдыман? 

«Защитник» рӱдерын «шокшо линийжын» телефонжо - 8-800-550-55-25.

Официальный сайт - защитник-рб.рф.