СВО-што улшо-влаклан полшат

МСДК вуйлатыше Л.А. Шамшукован мутшо почеш, калык дене пырля гуманитарный полышым погат, самырык ӱдыр-эрге, илалше еҥ-влакым чумырен, маскировочный сетьым пидыт, мӧҥгысӧ лашкам ямдылат… Ондакрак шке кумылын тӱрлӧ арверым наледеныт гын, кызыт СВО-што улшо-влак, кӧмытлан эҥерташ лиймым пален, шкешт мо кӱлмым йыҥгыртен шижтарат.

Тений май тылзыште автомобильым налаш йодмекышт, еҥ-влак адак оксам погаш тарваненыт. Нуно оксаштым вигак МСДК-н методистше В.Э. Тукаеван картышкыже колтыл кертыныт. Тунам ты акцийыш 250 наре еҥ рӱж ушнен да икмыняр пагыт гыч 193700 теҥгем чумырен шуктеныт. Но тӱрлӧ амаллан кӧра варажым автомобильым налаш кӱлын огыл, садлан кызыт улшо оксаштым моло арверлан кучылтыт. 

Теве шукерте огыл гына Мина позывноян рвезын отпусклан толмыж годым 81800 теҥгелан маскировочный сетьым, бензин дене пашам ыштыше генераторым, сварочный аппаратым, шлифовальный машинам, электрод-влакым, изолоным, газовый горелкым да шуко молым, кочкыш-йӱышым наледеныт. «Мыланна чыла сатум автомашина дене отпускыш толшо рвезе-влак почеш пуэн колташ йӧнанрак. Тыге вигак землякна-влак дек намиен шуктат», - каласкала Людмила Алексеевна.

Окса чотым йӧрата. Тудым кузе кучылтмым, тыгак чек-влакымат МСДК-н социальный лаштыклаштыже, мессенджерлаште улшо тӱшкаштыт ончыктат.

Кызыт Кояныште да лишыл яллаште илыше-влак пакчасаскам кошташ тӱҥалыныт. А вара, чылажымат изин-изин пакетлаш чумырен, лемым шолташ поген ямдылат да СВО-што улшо рвезе-влаклан колтат.