Шочмо кундемыш отпусклан пӧртылын

Усола ял рвезе январь тылзе гыч Запорожский направленийыште мотострелковый полкышто службым эрта. Школышто тунеммыж годымак пеш чулым, тале спортсмен ыле, писын куржталын, футбол дене сайын модын, садлан кызыт салтак йолташыже-влакланат «Спортсмен» позывной дене палыме. Школ деч вара тудо Москваште внутренний войскаште служитлен. Армий деч вара Йӱдвелне вахта йӧн дене пашам ыштен. Пытартыш жапыште шкенжын изирак бизнесше лийын.

«Тений телым, военкоматыш миен, мыйым СВО-ш колташ йодым, контрактым подписатлышым. Тушко каяш шонымем нерген авам ден ачамлан ойлышымат, кумылышт волыш, но мыйым ышт чаре. Мутат уке, нунымат, тений 1-ше классыш тунемаш кайыше Настя ӱдыремымат, моло лишыл еҥем-влакымат чот сагынем. Тиде икымше отпускем. Жапым арам йомдарыде, ты кечылаште авам ден ачамланат полшен кодынем, пӧртышкӧ газым пурташ документ-влакым ямдылем.

Салтак илышыште тӱрлӧ савыртышат лиеда. Тыгодым шкенан вел калыкын полшаш тыршымыже моткоч шерге. Башкортостан гыч гуманитарный полышым эреак налын шогена. Шочмо кундем гыч колтымо посылкылан чот йывыртена. Садлан, Шараныш миен, М.Р. Саитов дене вашлияш да шинчаваш таум ойлаш мыланем моткоч кумылло ыле. Гуманитарный полыш дене пырля йоча-влакын возымо серышыштымат колтат. Тугайжым лудатат, южгунам кумылат тодылалтеш. Ме, пырля служитлыше салтак-влак, икоян улына, кумылна боевой, сеҥен пӧртылына манын ӱшанена», - каласкалыш Спортсмен.