Тау тыланет, салтак…

Моло ӱдыр-рвезе-влак гаяк тудо Актыган ялысе индешияш школым тунем лектын. Тулеч вара Нефтекамск оласе шуко профилян колледжыште шинчымашым поген, чоҥымо паша дене кылдалтше профессийым налын. 

Саманын осал толкынжо самырык еҥын илышыштыже тура савыртышым ыштен. 2022 ий сентябрьыште элыште  увертарыме частичный мобилизаций почеш марий рвезе салтак радамыш ушнен. Роман специальный военный операцийыште ончыл линийыште кредалын. Ондак стрелок, пулеметчик лийын, варарак медбратлан служитлен. Шкенжым лӱддымӧ, чолга, ӱшанле, йолташыже-влаклан сай эҥертыш, пеҥгыде, чытышан салтак семын ончыктен. Шочмо ялышкыже отпускышкат икмыняр гана толын каен. Лач тунам пырля служитлыме салтак йолташыже-влаклан шочмо-кушмо вел гыч поген колтымо гуманитарный грузымат тудланак наҥгаяш ӱшаненыт. 

Чаманен каласаш логалеш, черетан боевой заданийым шуктымо годым, нелын сусыргымеке, тений апрель тылзыште Донецк Калык Республикын мландыштыже коло кандаш ияш рвезын ӱмыржӧ лугыч лийын… 

Патыр марий салтакым пытартыш корныш ужаташ пошкудо ялла гычат калык  чумырген. Райрӱдӧ гыч кугыжаныш кучемын еҥже да молат толыныт. Тиде кечын Роман лӱмеш ятыр поро шомак, таумут йоҥгеныт. Туныктышыжо, класс вуйлатышыже С.Т. Ивашкина школышто тыршен тунеммыже, сай койыш-шоктышан улмыжо нерген чонеш логалше мут дене шарналтен каласкален.  

Специальный военный операцийыште патырлыкым, лӱддымылыкым ончыктымыжлан Роман Артемович Исеметовым боевой отличий медаль-влак да Мужество орден дене палемденыт. Тале сарзын, Актыган ялын патыр эргыжын лӱмжӧ нигунам ок мондалт - тудо калык чонышто илаш тӱҥалеш.