Таза-эсен пӧртылза, салтак-влак!

Калтаса районысо Калмаш ялыште илыше калыкат СВО-што порысыштым шуктышо землякше-влак верч тургыжлана, вий шутымо семын нунылан полшаш тырша - гуманитар полышым чумырен, шийвундым поген колта. 

Тиде кечылаште кӱчык жаплан шочмо ялышкышт отпускыш толшо салтак-влакым порын вашлийыныт - тӱвыра пӧртын фойештыже сийым погеныт, ӱстел йыр шинчын мутланеныт.

Ялче-влак дене вашлиймашым Калмаш ялысе библиотекын пашаеҥже Д.П. Головко ден верысе тӱвыра пӧртын художественный вуйлатышыже Т.О. Мазитова ямдыленыт. Мӱндыр кундемыште элнан тыныс илышыже, эрыкше верч кучедалше марий сарзе-влак служба кузе эртыме, кузе илымышт нерген ойленыт, землякышт-влак деч мийыше гуманитар полышлан тауштеныт. Погынышо-влак дене пырля тиде кечын самырык призывник Н. Яников лийын. СВО гыч каналташ толшо салтак-влак тудлан службым сайын эрташ, командир-влаклан сай эҥертыш лияш сугыньленыт. Землякышт-влак дене вашлиймашке нунын родо-шочшышт, ял калык дене пырля тӱрлӧ ийготан йоча-влакат миеныт. «Специальный военный операцийын салтакше-влак дене вашлиймашыш ме эре йоча-влакымат ӱжына, - ойла Дина Петровна. - Нуным патриотизм шӱлышеш кушташ тыршена. Шочмо Элнам аралыше тыгай ӱшанле салтак-влакын улмыштлан кӧра ме тыныслын илена. Нуно тачысе саманын талешкыже-влак улыт. Самырык тукым тидым умылен кушшаш».