Ансамбльын подготовительный группышкыжо 24 йоча (Мишкан селасе 1-ше лицейыште 4-6 класслаште да 2-шо шуко профилян полилингвальный школышто 5-6 класслаште тунемше-влак) кушташ коштыт. Коллектив келшен ила, чыла мероприятийыш ик ой дене ушна. Лицеист-влак икымше класс гычак куштат, ончыч нуно «Шанс» йоча ансамбльыште шуаралтыныт. Йоча-влак чылан уста да талантан улыт. Икымше сентябрь гыч нуно «Эрвел» куштышо калык ансамбльын тӱҥ составышкыже пурат, туге гынат чылаштланат эше ятырлан тунемман.
Российысе тунемше-влак салтакна ден офицерна-влаклан специальный военный операций тӱҥалме жап гычак возат. Тиде поро йӱла Кугу Отечественный сар жапыште шочын. Тунам тыгай серыш салтакна-влаклан кугу куаным конден, ешартыш вийым пуэн. «Эрвел» подготовительный группысо йоча-влакынат серышышт специальный военный операцийыште кредалше землякна-влакын кумылыштым нӧлталеш манын ӱшанена. Ӱдыр-эргына-влак деч серыш-влакым Мишкан район администрацийын бизнес-шерифше Динар Муртазинлан пуымо. Лишыл жапыште нуным гуманитарный полыш дене пырля специальный военный операцийым эртарыме верлашке колтат.