Геройын партше

Геройын партше - лӱддымӧ землякна-влакын геройло подвигыштым, шочмо элна верч илышыштым пуаш ямде улмыштым шарныктыше парт. Тушан геройын фотографийжым, тудын илыш-корныжо да подвигше нерген уверым вераҥдыме. Геройын парт коклаштыже тунеммаште, спортышто сай кӱкшытыш шушо, школын мер илышыштыже ойыртемалтше тунемше-влак шинчаш тӱҥалыт.

Геройын партшым почмашке Шаран район администраций вуйлатыше М.З. Ахмадуллин, образований район пӧлкам вуйлатыше И.Л. Газизова, Акпарс ял поселенийым вуйлатыше Р.Г. Ягудин толыныт ыле, герой-влакын родо-шочшышт, йолташышт, туныктышо да тунемше-влак погынышт.

«Ме шкенан геройна-влакым палышаш да эре шарнышаш улына, - каласыш школ директор Г.Ф. Габдрахманова. - Юрий Абдреев ден Алексей Алтынбаев чын патриот лийыныт, шке илышыштым чаманыде, шочмо элнам ӱшанлын араленыт. Нунын нерген поро шарнымаш эре чоныштына илаш тӱҥалеш».

Геройын партшым Юрий Абдреевын Юлия шӱжаржылан да Алексей Алтынбаевын Геннадий изажлан почаш ӱшанышт. Акпарс школышто эн ончыч Геройын парт коклашкыже тыршен тунемше, предметный олимпиадылаште да тӱрлӧ конкурслаште сеҥыше, 6-шо классыште тунемше Арина Ташмурзиналан шинчаш темлышт. Тиде тунемшылан кугешнымаш веле огыл, пеш сай шарнымаш. 

Погынышо-влак ончылно тунемше-влак чоныш логалше почеламут-влакым сылнын лудыч. Нуным колыштын, шуко еҥын шинчавӱдшат йогыш.

Колышо-влакым шарнаш - илыше-влакын порысышт. Эртышым мондымаш - шочмо элна верч илышыштым пуышо-влакын чапыштым «ужалымаш». Нуно, шкеныштым чаманыде, мемнан, икшывына ден уныкана-влакын ончыкылыкыштым араленыт. Геройын партыштыже шочмо элна верч илышыштым пуышо рвезе-влакын лӱмышт курымешлан возалтын. Ме нуным эре шарнаш тӱҥалына!