Контракт службылан 600 тӱжем теҥгем кӧлан тӱлат?

Радий Хабировын пеҥгыдемдыме пунчал дене келшышын, Россий Оборона министерство дене Башкирий гыч контрактым ыштыше-влаклан 2024 ий 1 май гыч 31 август марте 205 тӱжем теҥге единовременный оксам тӱлат. Эше 195 тӱжем теҥгем контрактник Оборона министерство деч налеш. Тыгак республикын южо олала ден районлаштыжат ешартыш шийвундым тӱлаш палемденыт. Тыге 500-600 тӱжем теҥгем икганаште да тылзе еда 204 тӱжем теҥге утла оксам пашадар семын тӱлат. Эше фронтышто Leopard, Abrams, Challenger танкым але HIMARS пусковой установкым авалтен налмылан миллион теҥгем пуат. Башкирийыште контрактым частичный мобилизацийыш логалше, тыгак срочный военный службым эрташ кайыше, запасыште улшо-влак (эрык деч посна кодымо верлаште улшо-влак тиде тӱшкаш огыт пуро) ыштен кертыт. Уфаште контрактым ыштыше йот элын гражданже-влакланат шийвундым тӱлат. Минигали Шаймуратов лӱмеш батальонышто да Башкирийыште чумырымо моло подразделенийлаште контрактым ыштыше-влаклан тиде пунчал келшен ок тол.  

Эше могай полыш уло? Салтак-влакын ешыштлан «Ассы», «Зеленая роща», «Янган-Тау», «Карагай», «Красноусольск», «Танып», «Юматово», «Якты-Куль» санаторийлаш, «Березки», «Березка» каныме пӧртлаш, «Энергетик», «Радуга», «Бодрость», «Здравница Зауралья» тазартыме рӱдерлаш, «Ай» профилакторийыш тугок путевкым пуат. Нуно транспортлан налогым огыт тӱлӧ, пачерым рыночный ак деч шулдынрак налаш правашт уло. Контрактник-влакын икшывыштым школлаште тугок пукшат, кружок ден секцийлан огыт тӱлӧ, колледжлаште тугок тунемыт да молат. Тений шошо гыч СВО-н салтакше, ветеранже-влак «Время героев» кадровый программын икымше толкыныштыжо тунемаш йодмашым пуэн кертыт, нунылан тыгак вузлаште кӱшыл образованийым, гражданский специальностьым налаш йӧным ыштат. 

Кӧ контрактым ыштен кертеш? Контракт почеш военный службыш запасыште улшо 60 ийым темыдыме пӧръеҥ-влакым (шуэн вашлиялтше специальностян-влакым - 65 ий марте), тыгак армий службым эртыдыме, но кӱшыл але кыдалаш профессиональный образованиян-влакым налыт. Рядовой деч прапорщик марте салтак-влаклан контракт эн шагалже куд тылзе, офицер-влаклан кумыт гыч вич ий марте шуйна.  Контрактым ышташ военный комиссариатыш документ-влакым пуыман.  Йодмашым сайлыме пунктын инструкторжо онча. Вашмутым лу минут жапыште пуат. Психолог дене мутланымашым да медосмотрым эртыман. Предписанийым налмеке, службым эртыме верыш кайыман. Воинский частьыште контрактым ыштыман. 

Россий Оборона министерство дене контрактым ышташ шонышо-влак элын военный ведомствыжын 117 номеран единый справочный номерышкыже, Ситуационный рӱдерын 122 але (347) 218-19-19 номеран телефонышкыжо йыҥгыртен, «Мои документы» МФЦ рӱдерлаште йодыш-влакым рашемден кертыт. Контракт службым эртыме пунктын номерже: (347) 248-29-31. СВО-што контракт служба, салтак-влакын ешыштлан полыш дене кылдалтше йодышлан вашмутым башбат.рф сайтыште, телеграм-каналын t.me/contractRBBot чат-ботыштыжо вераҥденыт. Контракт службын радамже нерген кумданрак илыме верысе военкоматыште але Башкортостанын контракт службыш сайлыме пунктыштыжо (Уфа, Революционный урем, 156-ан пӧрт) каласкалаш ямде улыт.