Эрла 9 май - Кугу Ачамланде сарыште сеҥымылан тений 79 ий лиеш

Владимир Минильшин ден Александр эргыже (снимкыште ужыда) кокымшо ий военный операцийым эртарыме верыште улыт. Эргыже тушко кайымек, тудын пелен эҥертыш лияш, опытан еҥ семын полышым пуэн шогаш манын, ачажат шке кумылын йодмашым возен (Самырыкше годым армийыште десантный войскаште служитлен). Но сарыште чылажат лийын кертеш. Александрат телым ик татыште йӱлышӧ шучко вулно деч кораҥ шуктен огыл, сусырген. Кызыт Москваште госпитальыште эмлалтеш. Ачаж ден эргыже отпускышкат пырля толын каяш шоненыт улмаш. Но эрге госпитальыш логалын, садлан Владимир Минильшиным мӧҥгыштыжӧ Руфина пелашыже шкетшым вашлийын. А Александр эргышт деке госпитальыш пырля миен толыныт.

Ты кечылаште Руфина Николаевна марийжын служитлыме частьын командованийже деч тауштымо серышым налын. Владимир Леонидовичым кугу опытан, тӱрлӧ обстановкышто шонкален-вискален моштышо, чулымлыкым да молылан примерым ончыктышо сарзе семын палемденыт. Йолташыже-влакым туныктен, неле ситуаций годым нунылан эре полшен шога, командир-влакын пеш сай полышкалышышт манын возеныт.

Минильшинмытлан ыҥгайлык корным тыланен кодына. Александрлан - сайын эмлалташ да тазалыкшым пеҥгыдемдаш, Владимир Леонидовичлан умбакыжат уҥган, чолга лияш ӱнарже да вийже ситыже, а Руфина Николаевналан Юмо чытымашыжым куштылемдаш, марийже ден эргыжын сеҥымаш дене пӧртылмӧ татым лишемдаш полшен шогыжо.