Военно-патриотический клуб-влак коклаште таҥасеныт

Тушто Иглин, Мишкан, Буздяк, Давлекан, Зианчура, Федоровский районла, Стерлитамак ола гыч самырык-влакым патриотизм шӱлышеш куштышо 7 клубышто шуаралтше ӱдыр-рвезе-влак вийыштым тергеныт. 

Мишкан районын чапшым «Виктория» военно-патриотический клубын (Ирсай школын тунемшыже-влак Р. Аухатов, А. Шагиева, А. Саликаева, Т. Айкашев, А. Назмиев) командыже арален. Тудым школын туныктышыжо И.И. Ишмурзин вуйлатен. 

Йоча-влак строевой, огневой дисциплиныште, медицина конкурсышто, Калашников автоматым (АК-74) поген рончымаште, перекладиныште нӧлталалтмаште, 100 метрыш куржмаште, кужытыш тӧрштымаште вий-куатыштым тергеныт, военный топографийыште, вер-шӧрыштӧ ориентирований дене шинчымашыштым ончыктеныт. Яра жапыште нунылан «Легенда №17» фильмым, «Партизан-влакын ялышт» вер-шӧрым, военный техникын экспозицийжым ончыктеныт. 

Республикысе конкурсышто Мишкан районын командыже перекладиныште нӧлталалтмашыште 2-шо, 100 метрыш куржмаште 3-шо верыш лектын.