Пытартыш корныш ужатышт

Алексей Ишмурзинович Алтынбаев 1974 ий 16 февральыште Усола ялыште  шочын. Куд икшыве гыч Алексей эн изиже лийын. Пашам йӧратен, эре еҥлан полшаш тыршыше лийын кушкын. Усола да Акпарс школлам, Октябрьский олаште 56-шо лицейым тунем лектын. Россий армий радамыште Северодвинск олаште служитлен. Октябрьский олаште илен да пачерлаште евроремонтым ыштыме пашам шуктен.

Вячеслав Тимергареевич Ташмурзин 1981 ий 4 январьыште Тошто Чикей ялыште кандаш икшыван ешыште шочын. Ешыштышт Славик пытартыш йоча лийын. Папановка школышто 9 классым тунем лектын. Срочный служба годым Ленинградский областьыште механик-водительлан служитлен. Пӧртылмек, шочмо ялыштыжак аваже да изаж дене пырля илен. Пытартыш жапыште фермер-влак дене пашам ыштен. 

СВО жапыште ӧрдыжеш кодын кертын огытыл, коктынат шке кумылын каеныт. Вячеслав 2023 ий 31 октябрьыште, Алексей декабрь тылзыште служитлаш тӱҥалыныт. Боевой заданийым шуктышыла, Алексейын 2024 ий  25 январьыште, Вячеславын 6 мартыште ӱмырышт кӱрылтын.

Военный спецоперацийыште вуйым пыштыше землякна-влакын капыштым шочмо кундемыш кондымо нерген пален налмек, районысо «Боевое братство» ушемын ветеранже-влак ÿмыр лугыч лийше салтак-влакым воинский чап дене тояш погынен толыныт. 

Усола да Тошто Чикей клуб воктене эртыше траурный митингыш шуко еҥ погынен. Салтак-влак дене чеверласаш родо-тукымышт, пырля тунемме йолташышт, военкоматын, государственный властьын, район администрацийын представительышт, нуным палыше тыглай еҥ-влак Шаран села, Туймаза да Октябрьский олала да пошкудо ялла гыч толыныт.

Салтак-влакын лишыл еҥыштлан чаманымашым Башкортостан Республикысе Кугыжаныш Собранийын - Курултайын депутатше А. Андреев, Шаран район администраций вуйлатыше М.З. Ахмадуллин, Бакале да Шаран район-влакын военный комиссарышт Р.М. Каримов, районысо ветеран-влакын ушемыштым вуйлатыше М.Р. Саитов ойлышт. Алексейын Гена изаже шольыжым порын шарналтыш. Р.М. Каримов да М.Р. Саитов колотка ӱмбак пыштыме Россий Федерацийын флагшым йытыран осылышт да Алексейын изажлан, Вячеславын аважлан шарнен илаш кучыктышт.

Салтак-влакым пытартыш корныш траурный марш дене ужатышт. Алексейым ужатен ошкылмо годым игечыжат пуйто урмыжын шорто. Ончыч чарныде йӱр ложгыш, вара ала-кушеч тале ночко поран толын лекте да тугак кенета лыпланыш. Но колонно гыч ик еҥат ойырлен ыш код, чыланат шÿгарла марте шып ошкыльыч.

Кийыме мландыда пушкыдо лийже, ме тендам нигунам огына мондо. Чап тыланда, пагалыме землякна-влак!