Поро паша кок ӱмырым ила

Тушто ялче-влак, шке кумылын оксам поген, СВО-што служитлыше землякыштлан гуманитар полыш семын кӱлешан арвер-влакым налын колтеныт.  Тыгай пашалан нуным Тошто Яш ялын чолга рвезыже Л. Изибаев таратен. Тудо мобилизаций годым СВО-ш кайыше сарзе-влак дене эре вашкылыште улеш, илыш шотыштым пален-умыленак шога. Кызытат, тушто нунылан мо кӱлешым, кузе полшаш лиймым рашемден, шийвундым погымо, кӱлешан арверым чумырымо сомылым шке ӱмбакше налын. 

Суапле сомылыш ялсоветыш пурышо Тошто Яш, У Яш, Актыган, Уял, Братовщина ялласе калык, тыгак тушто шочын-кушшо, но кызыт шочмо вер-шӧрышт деч тораште илыше-влак ушненыт. Тӱшка вий дене тылзат пеле жапыште 121 тӱжем теҥге утла окса погынен. Тиде шийвундылан кӱлешан техникым, оборудованийым: инвенторный генераторым, газ баллоным, шлангым, бензопилалан шинам, напильникым, маскировкылан чиям, моло арверым, тыгак пашалан кучылташ ӱзгарым: кольмым, товарым, тыглай пискым, чӧгыт ден пудам - налыныт, марий шеврон-влакымат муыныт. Гуманитар полышым СВО гыч кок арнялан шочмо ялышкыже отпускыш толшо землякышт дене машинаш оптен ужатен колтеныт. 

Тиде кечылаште груз палемдыме верыш салтак-влак деке миен шуын. Ял калыклан полшен шогымыжлан, поро кумылыштлан шӱм гыч лекше таумутан ойыштым нуно видеосерыш гоч ончыктеныт.