Умбакыжат полшаш тӱҥалына

Школ коллектив кок маскировочный сетьым ямдылен, гуманитарный полышым пога, окса денат полша. Лишыл жапыште колташ туныктышо-влак тамле чак-чакым шуко кӱктен ямдыленыт. Тыгак боец-влаклан окопышто кучылташ 60 сортам ыштеныт. Нунылан ял калыкат калай банке-влакым погаш полшен. Сорта ышташлан парафин дене йӧраш шыштым мӱкш ончышо-влак Анатолий Ахметшин да Валентин Ахметшин ситышын конденыт. Тунемше-влакат ӧрдыжеш огыт код, Зинаида Бикьяновна Ильгузинан вуйлатымыж почеш салтак-влаклан сӱретым сӱретлат, талисманым ямдылат, серышым возат.

Шукерте огыл ялысе ӱдырамаш-влак, пырля погынен, салтак-влаклан колташ йӧрем лашкам пӱчкеден ямдылышна. Тыгай поро пашаш Рима Ахметшина, Вера Ахметшина, Нина Исламова, Роза Ташмурзина, Гулсултан Урсаева, Валя Шангареева уло кумылын ушнышт. Атнакаева Тамара акай шке толын кертын огылат, полыш семын ложашым пуэн колтыш. Гуманитарный конвой дене рвезе-влаклан эше шокшо носким, моло кӱлешан арверым колтена. Нуно тушто пеш кӱлешан улыт.

Акпарс сельский поселений гыч специальный военный операцийыште 19 рвезе Шочмо элым арала. Боецна-шамычлан умбакыжат полшаш ямде улына. Юмо саклен кондыштарыже, таза-эсен пӧртылышт.