«Тушто илышым аклаш тунемат…»

- Те СВО-ш кузе логалында? Лӱдыкшӧ шижмаш лийын? 

- СВО-ш мый 2022 ий шыжым частичный мобилизацийым увертарыме годым логальым. Военкомат гыч повестка толмеке, комиссийым эртышым, корныш погынаш кок сутка жапым пуыч. Мобилизацийыш логалшашым ончылгоч шижынам. Пелашемымат тидлан эркын ямдылышым. Эн чот йоча-влаклан увертараш неле ыле. Шкаланем каяш лӱдыкшӧ лийын огыл. Ме огыл гын, кӧ? 

- Боевой действий кайыме верлаште могай войскаште служитледа?

- Инженерно-саперный ротышто саперлан служитлем. 

- Тушто тендан, салтак-влакын, илыме вердам, ыштыш-кучышым кузерак йӧнештарыме? 

- Илыме верыштына чылажымат шкеак йӧнештаренна. Илена блиндажыште. Окоп-влакым кӱнчена, черет дене дежуритлена. Шкеак кочкышым ямдылена, вургемым мушкына. Мушкылташ кертме семын мончам чоҥышна, вынемым кӱнчышна - икманаш, чылажымат шке кид дене ыштена. Ялыште шочын-кушкынна вет. Илышыштем мый тыгай гоч эртенам, садлан тиде мылам у огыл - чылажат палыме. Моло-влаклан ик жап тунемашышт логале. Ынде кусаркален кондыштарыме мончанат уло. Тудым мыланна гуманитарный полыш дене пырля кондышт. 

- Тугеже, кундем гыч колтымо гуманитар полыш миен шуэш?  

- Чыла шуэш. Можо ок сите, ме кучылташ кӱлешан арверым, мутлан, кольмым, кандырам, молыжым, кочкышым шкежат наледена. Гуманитар полышым колтен шогымыштлан, йоча-влакын серышыштлан чылалан кугу таум каласена.  

- Службо жапыште лӱдыкшӧ ситуаций-влакат лийыныт, очыни? Тугай годым илышым арален кодаш мо полшен?

- Лийыныт, конешне. Мо полшымо шотышто каласаш моткоч неле. Тушто кугу опытан, пешат тӱткӧ сарзе-влакат лӱйкалымаш йымак логал кертыт. Кӧлан-кузе верештеш. 

- Отпускышто  лийында?  

- Отпускышто икмыняр гана лийынам. Тудым ешем пелен эртаренам, родо-шочшо, йолташем-влак дене вашлийынам. Илыме селаштем верланыше школлаште ӱжмышт почеш патырлык уроклашке миенам, волонтер-влак, полкышто пырля служитлыме сарзе-влакын ешышт дене мутланенам. Отпускышто жап пеш писын эрта. Лишыл еҥ-влак дене угыч ойырлаш моткоч неле…  

- Профессий дене кӧ улыда? 

- «Гражданкыште» мый нефтепромысел паша дене кылдалтше оборудованийын кугурак механикшылан тыршенам. Пашам пырля ыштыме коллегем-влак мылам, ешемлан чыла велымат полшат, ӱшанен вучат.  

- СВО кайыме верлаште еш, шочшо-влак дене кылым кучаш йӧн уло?  

- Тушто сото кылын укелыкше кугу нелылыкым ышта. Кунам икмыняр арня лишыл еҥет-влакын йӱкыштым колде, «мыйын чыла сай» манын увертарен от керт - тиде чоным пешат тургыжландара. Садланак ме рвезе-влак дене, пырля каҥашен, спутник антенным налаш кутырен келшышна. Тудын кузе ыштымыжым ойлен ом керт, тӱҥжӧ - ме лишыл еҥна-влак дене кылым кучен кертына. Южгунам видео денат мутланаш лиеш.

- СВО-што служитлыме жап илыш умылымашым вашталтен?  

- СВО-што илышым аклаш тунемат. Моланжым умыландараш ок кӱл, шонем. Тыгакат чыла раш. Икте-весылан полшымаш, икте-весылан эҥертымаш, икте-весым умылымаш тушто илыше кодаш, нелылыкым сеҥаш полшат. Чылалан пеҥгыде тазалыкым, чытышым, вуй ӱмбалне тынысле кавам тыланем. Ӱшаныза мыланна! Сеҥымаш мемнан лиеш! 

- Мутланаш жапым ойырымылан кугу тау. Чыладанат таза-эсен, сеҥымаш дене пӧртылмыдам вучена.