Салтак-влаклан маскировка сетьым пидына

2023-шо ийыште СВО-ш ятыр посылкым чумырымо. Погынен, межым шерын, шӱдырен, межноским пидын (45 мужыр), серышым возен, посылкым колтышна. Маскировка сетьын кӱлешлыкше нерген ятыр колмеке, тиде гана тудым пидын колташ каҥашышна. Тыгай сетке техникым, тӱрлӧ инженерный сооруженийым тушманын шинчаж деч авыра, салтак-влаклан шылаш йӧным ышта. Ялысе библиотекын пашаеҥже Зоя Баязова оксам погымо пашалан вуйын шоген. Тудо интернет-кевытыште сеткым да пидаш кӱлешан спанбонд материалым заказатлен. У Тынбай ял рвезе, КФХ вуйлатыше Станислав Ялитов, Сергей ачаж дене рейкым шелын ямдыленыт. Имне дене Сергей Аймурзин шупшыктен. Сеткым пидаш келыштарыме каркасым Валерий Ямакаев, Леонид Яныбеков, Федот Баязов да Вячеслав Шамыкаев чумыреныт. Тудым СДК-н фойештыже вераҥдыме. Сеткым пидаш ӱдырамаш-влак чумыргеныт - ик гана 15-16, вес гана 17-18 еҥ погынышна. Ава-влакын шокшо кидышт сеткын чыла ужашыж гоч эртен. Кажнына умыла: СВО-што кучедалше-влак мемнан тыныс илышнам аралат, а ме тыгай сеткым пидме дене иктажын гынат илышыжым саклен коден кертына. Ямдылыме вич сеткым Зоя Пазаевна кодшо арнян Мишканыш наҥгаен. 

Ялысе калык кертме семын оксам погымо пашашкат рӱж ушнен, 37400 теҥге чумырген. Кызыт пидаш уэш заказатлыме ныл сеткым да кӱлешан материалым кондымым вучена. 

Сеткым пидме деч посна, моло гуманитарный полышым ямдылымашат кугу верым айла. Салтак-влаклан посылкым чумыраш библиотекыш шокшо вургемым (трико, носки, перчатке), одеялым, мындерым намият, мӱйым колтышо-влакат улыт. Кӧ мо дене кертеш, туге полшаш тырша. Тыгай неле жапыште пырля чумырген гына сеҥымашым лишемдаш лиеш, тидым кажнына умыла. Чоным тургыжландарыше шоныш вашкерак пытыже, тӱнямбалне тыныс илыш лийже!