Отпуск жапыште вигак ЗАГС-ыш

«А тый СВО-шко кузе логалынат?» манмылан тыгерак каласыш:

 - Специальный военный операций тӱҥалмек, чыла йолташлан повестка толын, а мыланем - уке. Садлан, военкоматыш звонитлен, шке кумылын кайышым. Мый 2007-2009 ийлаште Екатеринбургышто служитлышым: икымше пел ийжым - срочный службышто, варажым контрактым подписатлышым. Кум ий служитленам, садлан СВО-што йӧсылыкым шым шиж. Йолташ-влак дене ик еш гай илена.

- Тендан вет тушто позывнойда уло? Тыйым кузе лӱмдат?

- Мыйын позывноем - «Апшат». 

Рвезе таклан огыл тыгай позывнойым налын, вет тудын Аймет кочажат, Артем ачажат ялыште апшатлан ыштеныт.

- А тендан каныш кечыда лиеш?

- Ме передовойышто шогена. Ныл кече тушто лийына, кок кечылан канаш лектына.

- Мо канымылан шотлалтеш?

- Мончаш пурена, вургемнам мушкын-тӧрлен чиена. СВО-што служитлаш тӱҥалме годсек мый уже кок гана отпусклан пӧртыльым. Тиде отпуск деч ончыч, шкат паледа, сусырген, эмлалташ толынам ыле. Ты ганаже корнышто шонен тольым: «Могай ӱдырым эн ончыч вашлиям, туддене ЗАГС-ыш каем». Теве тыге мый пелашан лийым. Луымшо январьыште сералтна. Пелашемын лӱмжӧ - Инна. Тудо мыланем икымше ужмаштак келшен шинче.

- А тиде медалет-влакым СВО-што сулен налынат мо?

- Да, иктыже - «За боевое отличие», весыже - полковой награда. Мый СВО-ш кайымемлан ом ӧкынӧ, ешым погымо деч ончычак Пӱрӧ олаште пачерым нальым. Ялыште шочмо суртыштем авам, шольым вучат. Алена акам ден Владимир курскамлан пеш кугу таум каласем. Екатеринбургышто Зина акам мыйын верч тургыжлана. Ялыште пошкудем-влак чылан пеш поро чонан улыт. Чот йӧсӧ пагыт годым чыла сайым шарналтем, да чонлан куштылго лиеш, умбакыжат илыме шуэш. А ындыжым вучышо пелашемат уло.

Тиде рвезылан таза-эсен кошташыже Ош Кугу Юмо, Шукчо-Пуйырышыжо, Шочынава-Шочыначаже полшен шогышт. Тыгай пуламыр вашкерак пытен, чылаштлан СВО гыч ешан-ешышкышт таза-эсен пӧртыл толаш тыланем.