Салтакын пытартыш серышыже

Дима элнан йӧсӧ жапыштыже шке кумылын Шочмо элым да Российын у регионжо-влакым аралаш кайыш. Младший сержант, теҥыз пехота взвод командирын заместительже лийын. Элыштына тыгай патриот-влак улмо годым мемнам иктат сеҥен огеш керт.

Диман тетла уке улмыжым шинчавӱд деч посна шарнаш огеш лий, тудо шкеак шырчен лектеш, логарыш комыля кӱза. Йӧсӧ, пеш йӧсӧ. Эше йӧсылыкым пытартыш серышыже ешара.

Тиде серышым Дима СВО-ш кайымыж деч ончыч олмапу йымалан тоен. Тудын нерген кугу изажым тояш толмыж годым изирак изажлан ойлен коден. Диман ӱмыржӧ кӱрылтмек, изаже серышым муын. Теве тудо.

«Сай улыда чыланат. Тиде серышым мый, Дима Атыев, ала трук илыше ом пӧртыл манын, шке кидем дене возен кодем. Тыште тыланда шкемын поступкемым умыландарынем. 

Россий Федерацийын Вооруженный вий радамышкыже, Шочмо элым, лишыл еҥем-влакым, чыла палымемым, мыйым палыше еҥ-влакым аралаш шонен, шке кумылын кайышым. Иктаж-кӧм ӧпкелтаренам гын, вуеш ида нал. 

Ончыкылык илышна тыныс да поро лиеш манын ӱшанем. Икте-весыдам йӧратыза, пагалыза. Меат тушто, каваште, тендан верч кумалаш тӱҥалына. Авай, чыла титакемым кудалте. Мый тыйым йӧратем. Ачайлан да тыланет мыланем илышым пуымыланда, чын айдеме лияш туныктен куштымыланда кугу тау. Родо-шочшем-влак, те мыйым умыледа да проститледа манын шонем. Мый тендам йӧратем.

Ты серышым лудмыдам кава гыч эскерем да тыланда шыргыжал тауштем. Мый тендам чыладам йӧратем.

Руш калык огеш чакне! Российлан чап лийже! Честь имею!

Мыят, Дима, пеленда шогем, шкемын да мыйым ужатыше чыла еҥын ӱмбак ончем. Тау».

Ласкан мале, кийыме верет пушкыдо лийже, узьмакыште лий, Дима.