РФ Правительство калыклан «селасе ипотека» программе почеш кредитым пуашлан 7 млрд теҥге шийвундым ойыраш палемден. Тиде, ешарен, элысе 15 тӱжем ешлан илыме верым саемдаш йӧным ышта. «Экономика ситуаций вашталтын, да чоҥымо пашан акше шергештын гынат, села-влакым вияҥдыме кугыжаныш программа тичмашын шукталтшаш, селалаште калыклан илаш йӧнан средам ыштыман», - палемден РФ Правительство вуйлатышын алмаштышыже В. Абрамченко. Селам вияҥдыме йодышым илышыш кӱлеш семын шыҥдарашлан тудо Ял озанлык, Финанс, Чоҥымаш министерство-влаклан, Росавтодорлан темлымаш-влакым ямдылаш шӱден.
2022-2023 тунемме ийлаште элысе вузлаште бюджет вер-влак 11,5 тӱжемлан шукырак лийыт. Тидын нерген РФ образований да наука министрын алмаштышыже Дмитрий Афанасьев увертарен.
Российыште газет да офсет кагаз ситышашлык, тиде сырьелан дефицит уке, увертара РФ Цифровой вияҥмаш, связь да тӱшка коммуникаций министерство. «Ончыч элыште лукмо газет кагазын 80 процентшым экспортыш колтеныт, садлан редакций-влак европын санкцийже-влакым шижшаш огытыл. Книга ден журнал индустрий шкенан элысе офсет кагазым кучылташ тӱҥалыт. Ончыч Российыште ситыдыме мелованный кагазым, полиграфийыште кучылтмо чиям Евросоюз гыч импорт семын конденыт гын, ынде тудым ситараш шкенан кагаз комбинатлаште производствым кугемдаш тӱҥалыт, тыгак импортым вес кундемла (эн ондак Китай) гыч вияҥдат.
Российысе фармацевтика компаний-влак илышлан эн чот кӱлешанлан шотлалтше эмым (ЖНЛВП тӱшка) ышташлан кугыжаныш деч грантым налын кертыт, увертара РФ Правительство. Тидын нерген пунчалеш РФ Правительствын вуйлатышыже Михаил Мишустин кидпалыжым пыштен. Эмын образецше-влакын базыштым ыштымаш Российлан тиде сатун импортшо деч кораҥаш йӧным ышта. Кугыжаныш полышлан кӧра тений мемнан элыште 300 тӱрлӧ наре эмым ышташ шонат. Производствын икымше йыжыҥыштыже тиде сомыллан 300 миллион теҥге оксам ойырат.
Тений кеҥежым тазартыме лагерьлаште эл мучко 5 млн наре йоча каналта. Тиде сомыллан 58,7 млрд теҥгем ойырат. Тазартыме кампанийыш 38,7 тӱжем организаций ушна. Тидын нерген Российын вице-премьерже Т. Голикова кеҥеж каныш шотышто регион-влак дене погынымашыште увертарен. Тылеч посна Арктика зоныш пурышо регионласе 5-8 классыште тунемше 6 тӱжем утла икшыве Шем теҥыз воктене, Крымыште, Севастопольышто, Каспий да Япон теҥызлаште, Адыгейыште, Кавказысе Минеральные Воды курортлаште тугок каналтат. Тидлан Россий Правительство ешартыш 500 млн теҥге оксам ойырен. Тыгодым вице-премьер нине тазартыме учрежденийлаште коронавирус деч аралалтме шотышто Роспотребнадзорын йодмашыжым пеҥгыдын шукташ кӱлмым палемден.