Тӱҥжӧ теве мом палыман - нимогай кугу вашталтышым пуртымо огыл. Правилысе чумыр шонымаш ончычсо гаяк кодын - кеч-мом ыштеда гынат, моло еҥлан ида мешай, планировкым ида вашталтыл, пӧрт ынже сӱмырлӧ манын, нумалше конструкцийым ида тӱкале, пачерым жапыштыже ачален, «коммуналкылан» тӱлен шогыза. Документыште нимогай у штраф нергенат возымо огыл. Чумыр ончымаште, тиде федеральный закон-влак негызеш ямдылыме памятке.
Но балкон ден лоджий-влакым яндалыме дене кылдалтше нормыжо СМИ-лаште да социальный лаштыклаште йӱк-йӱаным тарватен. Южышт балконым разрешений деч посна яндалымылан илыме вер оза-влаклан штрафым тӱлыктен, рончаш шӱден кертме нергенат возеныт. Но чынжым документыште возымым йоҥылышрак умылымылан да специалист-влак дене рашемден шуктыдымылан кӧра у правилыште возымым шке семын радамленыт...
У документыште мом возымым кӱчыкын тыге каласаш лиеш:
У правилыште пачер озалан 20 ий ончыч шындыме окнам кораҥдаш кӱлмӧ нерген нимом каласыме огыл.
Балконым яндалымылан нимогай штрафым огыт тӱлыктӧ. Шуко пачеран пӧртыштӧ закон шӱдымӧ деч посна планировкым вашталтымылан да инженерный сетьым, электрооборудованийым да молым вес вере кусарымылан гына еҥ-влаклан 2000 гыч 2500 теҥге, юридический лица-влаклан 40000 гыч 50000 теҥге марте штрафым тӱлыктен кертыт (РФ КоАП-ын 7.21 статьяже).
Но тиде у огыл, шонымо семын планировкым вашталтылаш, мутлан, пачерым ачалыме годым пырдыжым кораҥдаш да балкон ден кухньым ушаш, ончычат чареныт. Тидын шотышто администрацийыште кутырен келшыман.
Вашталтыш нерген, икмыняр ий эртымек, пачерым ужалыме годым пален налыт але пошкудо-влак шижтарат гын, озалан штрафым тӱлаш да чылажымат проектыште ончыктымо семын тӧрлаш але ты йодышым согласоватлаш логалеш.
Ынде приватизироватлыдыме пачерыште соцнайм почеш илыше-влак наймодательлан (муниципалитет администрацийлан) пачер, сантехника да арвер-влак дене кылдалтше ситыдымаш шотышто увертарышаш улыт. Ончыч «кӱлеш годым» гына шижтарыман улмаш. Тылеч посна наниматель-влак администраций, кугыжаныш контроль да надзор орган гыч мийыше-влакым пачерын технический да санитарный состоянийжым ончалаш пуртышаш улыт. А пачер оза-влак шотышто тыгай правил уке.