+20 °С
Дождь
Еш - илыш негыз
29 Июля , 08:44
Ешемын историйже Чормакыште тӱҥалын
Шукерте огыл мый ачамын, Иван Николаевич Петровын, чарайолын куржталме вер-шӧрышкыжӧ - Чормакыш - миен тольым. Тудо тиде тымык лукышто шочын, тыштак икымше ошкылым ыштен, икымше гана йӱкын куанен воштылын, йоча пагытшым юарлен эртарен, ял илышын куанжым да ойгыжым пален налын. Ава-ачаже тудын дене пырля шӱжарже ден изаже-влакымат ончен куштеныт. Тыге мыйын ешемын историйже тӱҥалын.
Галина ден Иван Петровмыт. Еш архив гыч налме фото.
«ЧОЛМАН» ГАЗЕТЫМ МАX-ЫШТЕ ЛУДЫНА!
Чормак мландым тошкен эртыме годым умылет: ме - тиде мемнан сеҥымашна веле огыл, тиде эше кугезына-влак, нунын кӧргӧ вий-куатышт да шочмо мландым йӧратымышт. Ты верлам шарнен илена гын, нунат мемнан чонышто курымеш илат.
Тусо пасун тӱсшым, Кугезе Вуй курыкым, Изэҥер йогыным, тачысе кечылан келыштарыме суртан тошто уремлам ончен эртыме годым тунамсе ден кызытсе жап кокласе мучашдыме кыл шижалтеш. Тышан ешнан вожшо кодын… Мардеж нунын йӱкыштым, историйыштым кызытат аралымыла чучеш.
Кугезе суртыш миен толмаш - шке чоныш ончалме гаяк. Тыге кушеч улмынам да кӧ мыланна илышым пуымым шижына. Тимофей изам кугезына-влакын сурт олмыштым пытараш ок пу - чыла уэмден шога. А Лида еҥгамын сад-пакчажым ончен куанет - чылажат эрыкталтын, жапыштыже шуктен ышталтын.
Кажне еҥын шӱм вургыж мийыме верже уло. Мыланем тиде - Чормак. Вуйым савем тылат, Чормак!
Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!
