Ик еш гыч кок офицер

Кугурак Кирилл эргышт Акпарс кыдалаш школ деч вара Туймазасе индустриальный колледжым тунем лектын. 2019-ше ийыште армийыш каен. А идалык гыч контрактым подписатлен да умбакыже служитлаш тӱҥалын. 

2023 ийыште спортым йӧратыше, таза кап-кылан рвезе Петр Великий лӱмеш Стратегический назначениян ракетный войскан военный академийжын Серпухов оласе филиалышкыже ядерный вооружений факультетыш тунемаш пурен. 2025 ийыште марий рвезе Москваште Йошкар площадьыште лийше военный парадыште участвоватлен. Теният 9 Май кечын академийын чапшым арала да Москвасе парадыште строй дене кокымшо гана ошкыл эрта.

Курмакаевмытын Саша эргыштат эре военный лияш шонен. Школышто тунеммыж годымак спортын тӱрлӧ видше дене заниматлен, куржталмаште, ече дене таҥасымашлаште вийжым да писылыкшым терген да ятыр гана районышто ончыл верым наледен. Школ деч вара Санкт-Петербург олаште верланыше Михайловский военный артиллерий академийын юж десант войскан да теҥыз пехотын артиллерийышт факультетыште шинчымашым поген. Изи гына марий ялыште шочын-кушшо марий рвезе декабрь мучаште дипломым налын. Питерыш эргыштым саламлаш аваж ден ачажат миеныт, Сашан пырля тунемме йолташыже-влак да ава-ачашт дене палыме лийыныт. Распределений почеш самырык лейтенант Калининградский областьысе Балтийск олаште служитлаш тӱҥалеш. Тыге Курмакаевмыт тукымышто эше ик офицер ешаралтын. Икымшыже - нунын пагалыме кок шочмо изашт, подполковник Валентин Анатольевич Курмакаев.

Кызыт ача-ава пелен Егор эргышт гына кодын. Тудо Акпарс школышто 9-ше классыште тунемеш. Кӧ пала, ала тудат, илен-толын, изаже-влакын корнымак тошкаш шонен пышта?

У ий жапысе каныш кечылам тений Курмакаевмыт чылан пырля эртареныт. Ятыр ий вахта йӧн дене Нижневартовскышто водительлан ыштыше еш оза Владимир Ульяновичын лачак каныме жапше лийын. Марийже пашаште годым суртысо чыла сомылым Эльза Исламгареевналан (Мешереш шочын-кушкын) шукташ логалеш. Нуно шуко вольыкым, кайыквусым ашнат, кеҥежым тӱрлӧ пакчасаскам да емыжым куштат. Шкаланышт веле огыл, пазарыште ужалашат ситарат.  

Вате-марий чыла сомылым пырля каҥашен ыштат, эрге-влакат нимогай паша деч огыт лӱд. Ешыште икте-весым пагалымаш, умылымаш озалана. Рвезе-влакым ачашт-авашт сайын туныктен куштеныт, нуно чыла шотыштат пример улыт.