Ваш келшен да икте-весылан эҥертен илат

Тудо жапысе ӱдыр-рвезе-влаклан кызыт 60-75 ий темын, шукыштын ешым чумырен илымыштлан пел курымат эртен але шуэш. 1975-ше ийыште Тынбай ялыште эн шуко сÿан гӱжлен, очыни. Лу мужыр ÿдыр-рвезе, ешым чумырен, кугу марий сÿаным эртарен, ялеш илаш кодын. Тиде Петрушкинмыт, Аймурзинмыт, Шамыкаевмыт, изак-шоляк Илинбаевмыт, Айдугуловмыт, Шамыковмыт, Абдулинмыт, Кутиевмыт, Николаевмыт. 1976-шо ий тÿҥалтыште Имаевмыт да Ибашевмыт ешым чумырен илаш тÿҥалыныт.  Тыге кодший ныл еш пел курым пырля илыме кечыжым пайремлыш, тений эше кок еш палемда. Нуно чыланат ялыштына пагалыме еҥ улыт. 

Антон Андреевич Петрушкин, Башкир ял озанлык институтын экономика да бухгалтерский учёт факультетшым тунем пытарымеке, 36 ий «Первомайский» колхозышто тÿҥ бухгалтерлан тыршен. Кок ий ялсоветын бухгалтерже лийын. Ватыж дене коктынат «Пашан ветеранже» лÿмым сулен налыныт. Анна Семёновнан чумыр стажше - 35 ий. Тушеч 24 ийжым школышто техничкылан тыршен. Почтальонын пашажымат шуктен, колхоз пашашкат коштын. Вате-марий кум икшывым - Сергейым, Снежанам, Лианам - ончен куштеныт. Кызыт коча-ковам кум уныка куандара. 

Вячеслав Шамыкович Шамыкаев 28 ий «Первомайский» колхозышто водительлан тыршен. «Кубань» автобус, КАМАЗ машина дене коштын. 13 ий школ автобус дене йоча-влакым шупшыктен. Паша стажше 41 ийыш чумырген. Наталья Андреевнан чумыр стажше - 38 ий. Колхозышто бухгалтер-кассирлан, 25 ий сельпо кевытыште ужалкалышылан тыршен.1980-ше ийлаште фольклор ансамбльын чолга участницыже лийын, кызыт СДК пеленсе «Изэҥер» ансамбльыш мураш коштеш. Вате-марий коктынат пашан ветеранже улыт. Надежда, Светлана, Родион, Юрий икшывышт ава-ачалан 12 уныкам пӧлекленыт. Кум уныкалан кугезе коча-кова улыт.

Леонид Айкаметович Аймурзинын паша стажше - 41 ий. «Первомайский» колхозышто «Беларусь» трактор дене коштын, фермыште кочегарлан тыршен, вÿд шупшыктышо лийын. Тушеч 13 ийжым йочасадыште ороллан тыршен. Марипа Михайловна 25 ий школышто, 13 ий ялсоветыште техничкылан ыштен. Вате-марий коктынат пашан ветеранже улыт. Сергей, Александр, Станислав, Вячеслав эргышт ача-авалан 6 уныкам пӧлекленыт.

Леонид Георгиевич Илинбаев, Уфасе автотранспортный техникумым тунем лекмек, шочмо ялышкыже пӧртылын. 23 ий колхозышто автомеханиклан тыршен. Перестройко жапыште, колхоз шаланымек, кум ий лесниклан ыштен.  Шке профессийжым йӧратыше специалист индеш ий вахте йӧн дене Сургут олаште автомеханикын пашажым шуктен. Екатерина Сапараевна Благовещенск педучилищыште, паша деч кÿрылтде, Н. Крупская лÿмеш Марпединститутышто шинчымашым налын. Тÿҥалтыш класслаште 25 ий, йочасадыште воспитательлан, вуйлатышылан 10 ий тыршен. Пашан ветеранже улеш. Вате-марий кум ÿдырым илыш корныш луктыныт. Оксана, Лиана, Оляна ава-ачалан индеш уныкам пӧлекленыт. Коча-ковам ик кугезе уныка куандара.

Имаевмыт 50 ий пырля илыме сÿан кечыштым 2026 ий мартыште палемдат. Николай Иликаевич Кумертау оласе физкультурный техникумым тунем лектын. Лу ий физкультурым туныктышылан да тренерлан тыршен. Коло ий Бажан лесничествын лесникше лийын. Частный предпринимательын пашажымат шуктен. Зоя Георгиевна 33 ий Тынбай сельский библиотекын библиотекарьжылан тыршен. Пашан ветеранже, 70-80-ше ийлаште кундемыштына чапланыше фольклор ансамбльыште мурен-куштен.  Вате-марий кум икшывым - Игорьым, Олесям, Сергейым - ончен куштеныт. Коча-ковам шым уныка куандара.

Ибашевмыт пел курым пырля илыме сÿан кечыштым тений июньышто палемдат. Владимир Иванович Дуван ял озанлык техникумым, паша деч кÿрылтде, Башкир ял озанлык институтышто зоотехниклан тунем лектын. Латик ий Калинин лÿмеш колхозышто, латвич ий «Первомайский» колхозышто тÿҥ зоотехниклан тыршен. Перестройко жапыште колхоз шаланымек, латик ий Бирск оласе «Башкирская» ГУСП МТС-ыште менеджерлан тыршен. Вате-марий коктынат пашан ветеранже улыт. Любовь Александровнан паша стажше - 36 ий. Ӱмыржӧ мучко йочасадыште воспитательын полышкалышыжлан тыршен. Ончыч Кугу Соказа ялысе йочасадыште, вара Тынбай ялысе «Василёк» йочасадыште икшыве-влаклан кокымшо ава гай лийын. Людмила, Светлана, Вячеслав, Ирина икшывышт ава-ачалан 11 уныкам пӧлекленыт. 

Пел курым ваш келшен илыше-влак деч «Еш илышдан секретше могай?» манын йодмемлан тыгай вашмут-влакым кольым:

- Тынар жап эртымылан ÿшанашат йӧсӧ. Илышыште чылажат лиеш. Но эн тӱҥжӧ -  икте-весым колыштын, келшен, пагален илыман. Сурт сомылым пырля каҥашен шуктыман, каненат моштыман. Тунам пагыт эртымымат, пашан нелылыкшымат от шиж.

- Таза лийын, пашам ыштен, икшыве-влакым йолÿмбак шогалташ, туныктен лукташ, нунылан ешым чумыраш полшаш, икшыве, уныка-влаклан куанен илаш - теве тыгай шонымаш дене иленна. 

- Еш илышыште икте-весым пагалымаш ончылно лийшаш. Пӧръеҥжат, ÿдырамашыжат ик ой дене илыман, кÿлеш годым корнымат пуэн моштыман.

- Илышыште эн тÿҥ - тыршымаш. Илаш тыршенна, паша деч лÿдылтын огыл. Икшывым кушташ, пӧртым ышташ, суртым кучаш, еш илышым вÿдаш кÿлын. Чыла тидым вате-марий каҥашен гына ыштен кертыт.

- Поро паша кок ÿмыран, сандене сайым, порым веле ыштен, еш кӧргыштӧ, родо-шочшо, пошкудо-влак да ял калык дене келшен илыман. Келшымаште - вий. 

- Илышыште йӧратымашат кугу верым налеш, шерге улеш. Икте-весым арален, аклен, йӧратен илыман. Икшыве, уныка-влакын чыла сай лийже, куандарен шогышт. Ава-ачамат, коча-ковамат ынышт мондо, пагален илышт. Тиде мыланна - эн кугу пиал. 

Теве тыгай пашам йӧратыше, ешыштым пагалыше, ялыште эртарыме тÿшка пашалаште кызытат полшаш ямде, чолга, ял калык дене келшен илыше пагалыме еш-влак илат мемнан Тынбай кундемыште.