Икшывышт - ава-ачан куанышт

Суртоза, Артем Владимирович, Марин ялыште шочын, Зоя Пекиновна ден Владимир Михайловичын ешыштышт визымше икшыве улеш. Галина пелашыжат Бакале район Палчикле ялеш шуко икшыван ешеш шочын - Раиса Давлеевна ден Василий Усманович Альмухаметовмытын ешыштышт кумшо икшыве. Тудын ялышкыже Артем Павел йолташыжым марлан налшаш ӱдыржӧ деке намиен улмаш. Лач тушто шкежат ончыкылык пелашыж дене палыме лийын. Тунам Галина 11 классыште тунемын. Канде шинчан, волгыдо ӱпан мотор каче шинчаш перныде кодын огыл. Галинажат тудлан лач келшен толеш - весела койыш-шоктышыжо, яндар йӱкшӧ, моторын шыргыжалмыже самырык рвезын чонешыже логалыныт. 

Ӱдырын школым тунем лекмыжым Артем чон вургыжын вучен, школ деч вара вигак ава-ачан суртыш налын толын. Тыге Галина тиде ялеш кодын, пырля илаш тӱҥалыныт. Вич икшывым ончен куштат, эн изи ӱдырышт 3 ийым темен. Икшыве-влакым куштымо коклаште Галина заочно тунемын - кыдалаш профессиональный образованийым налын. Куштылго огыл жапыште кова-коча-влакын полышышт нелылыкым ятырлан куштылемден. Марин ялыште тугодым чылан пырля ик еш гай келшен иленыт. 

Но ялыште ни йочасад, ни школ уке улмылан кӧра самырык еш 2023 ийыште Андреевка селаште пӧртым налын. Ынде кугурак икшыве-влаклан школыш кошташ йӧнан - автобус дене кудалышташ ок кӱл. Изирак йоча-влак йочасадыш мияш кумылан улыт. 

Артем Владимирович А.А. Ким лӱмеш кресаньык-фермер озанлыкыште пашам ышта. Галина Васильевна сурт кокласе сомылым ворандара. Тушто пашаже ситышын, вет Умурьяновмыт еш сурткайыкым онча, тӱкан кугу вольыкымат ашна. Уто шӧрым, ӱмбалым да моло шӧр сатум молылан ужалашат ситарат.