Витле ий пырля илаш - кугу пиал

Ешыште кок эрге да кум ӱдыр шочыныт. Ача-авана Виталий Иргубаевич ден Галина Юзукбаевна ӱмырышт мучко Ленин лӱмеш колхозышто тыршеныт. Пашам йӧратымышт эре ончыл радамыште лияш вий-куатым пуэн шоген. «Паша илаш туныкта» манме шомакышт мыланна девиз семын лийын. Нуно мемнам изинек кугыракым пагалаш, изираклан полшаш, куаным-йӧсым лош пайлаш, икте-весылан эҥертыш лияш туныктен куштеныт. Поро чонан улмыштлан чыла родо-шочшына, пошкудына-влак суртышкына унала пурен лекташ вашкат. 

Ача-аванан ешым чумырымыштлан тений витле ий темеш. Ме, икшывышт-уныкашт-влак, нунылан пеҥгыде тазалыкым тыланена. Мемнам ончен куштымылан, йол ӱмбак шогалтымылан, пашам ышташ туныктымылан таум каласена да вуйнам савена. Тек мемнан суртна эреак йоча да уныка йӱк дене шергылтеш. Мемнан сеҥымашна ден пиалналан куанен илыза.