Ваш умылен да полшен илыман

Башкортостанын Общественный палатыже тыгай конкурсым кокымшо гана эртара. Кодший тушко ушнаш 37 муниципальный образований гыч 106 йодмашым колтеныт да тушеч 23 еҥым ойырен налыныт гын, тений конкурс комиссий 47 муниципалитет гыч пурышо 184 йодмашым аклен-лончылен да 27 пӧръеҥлан наградым пуаш кутырен келшен. 

Конгресс-холлышто «Отцовская доблесть» мер наградым: оҥеш пижыктыме знакым, удостоверенийжым да лауреат грамотым - кучыктымо еш-влак коклаште (тушко пӧръеҥ-влакым ватышт дене пырля ӱжыныт) Мишкан район Ардаш ялыште илыше Хамитовмытат лийыныт. Галина Эриковна ден Владимир Ильич ешыштышт кум ӱдырым ончен куштеныт да эше кок ӱдыр ден ик эргылан ача-авам алмаштеныт. Татьяна ӱдырышт кӱшыл шинчымашым налын, пашам ышта, Елена вузышто кумшо курсышто, а Дарья кыдалаш школышто луымшо классыште тунемыт. Нунын ешыште кушшо Ангелина ынде шкежат ава улеш, а латкок ияш Руслан ден индеш ияш Илонам кугемден шуктымеш да илыш корныш лукмеш, эше шуко тыршыман. Вий-куатым ситарыман, йӧратен да чаманен моштыман, кӱлеш «йогыныш» виктарен колтыман, сомыллан туныктыман…

Вате-марий Хамитовмытын тидлан шинчымашышт да шижмашышт сита, вет образований дене коктынат педагог улыт. Галина Эриковна, Марий Элысе Оршанке район Кугунур ял ӱдыр, Йошкар-Олаште Марий пединститутым, Владимир Ильич туштак Марий университетым тунем лектыныт. Суртоза ятыр ий годсек ял клубышто тырша, кызытше культорганизатор улеш, пелашыже - библиотека пашаеҥ.

Вате-марий икте-весылан эҥертен, ваш полшен илат, кеч-могай сомылым пырля шуктат, суртозан клубышто тарватыме мероприятийлаш ватыжат, икшыве-влакат уло кумылын ушнат. Галина Эриковна, Таня, Лена, Ангелина да Даша - уста музиканче Владимир Ильичын вуйлатыме клубысо да еш ансамбльыштын чолга участникышт - ятыр концертыште выступатленыт, марий койыш-шоктышна дене ӧрдыж кундемласе калыкымат палдареныт, элысе конкурслаштат ончыл верлам наледеныт. Вес ганарак тидлан Руслан ден Миланамат кумылаҥден шуктат дыр. А кызытеш нунын тӱҥ сомылышт - кыртмен тунемаш, суртышто изирак сомылым ыштылаш, кӱтӱ гыч вольыкым кондаш, модаш… 

Икоян ешыште паша сайынрак ворана, маныт. Хамитовмытланат тазалыкым да чыла сайым гына тыланыме шуэш. Мер награда дене уло кумылын саламлена! Тек ончыкыжат чыла шонымашда шукталтеш, илышыштыда ятыр куандарыше тат лиеш!

«Башинформын» да еш архив гыч налме фото-влак.