Тений Ермолай Ярмингинлан 90 ий темеш ыле

Февраль тӱҥалтыште юбилей пайремышкем Бирск, Нефтекамск олала да Чорай, У Тымбай ялла гыч шочшем-влакын уныкашт унала толыныт ыле. Ятыр пӧлекым конденыт. Кызыт тукымыштына мый эн кугурак ийготанлан шотлалтам. Ончыч Алек кочана эн шоҥго лийын. Тудо 83 ияш ӱмыржым шуктен.

Уна-влак фотоальбомым ончен шинчышт. Тушто военный вургеман-влак кокла гыч Ермолайын фотожым ужмеке, уныкаже тыгерак каласыш: «Кочамын тыгай фотожым иканат ужын омыл, кузе илымыжымат огына пале». Мый Ермолай кочажын илышыже нерген кӱчыкын каласкалышым. Ярмиҥга кугезе кочаштын шым икшывыже лийын. Икымше икшывыже - Ермолай - Кугу сар тӱҥалме годым лу ийым темен (Согыш деч ончыч Ярмиҥга дене Эчукын ныл икшывышт лийын.). Ярмиҥга согышыш каен. Ермолайлан аважлан йоча-влакым ончаш полшаш логалын. Колхоз пашаштат тыршаш кӱлын. Кеҥежым пасушто пашам ыштеныт, шӱкшудым сомыленыт, вольыкым кӱтеныт, тырмаленыт. Телым школышто тунемыныт, йыдалым тодыныт. Кугу согыш пытымеке, ачаже суртыш пӧртылын. Ермолай, шым классым пытарымеке, умбакыжат тунемаш шонен. Колхоз пашаш миен толмеке, кастене тунемаш пураш ямдылалтын. Иван Ибатов дене Краснокам педучилищыш тунемаш каеныт. Коктынат экзаменым сайын кученыт да тунемаш пуреныт. Нунылан частный пачерыште илаш пернен. Тушто йӱштӧ лийын, вашке капешышт сӱван лекташ тӱҥалын. Училищын директоржо нунын илышышт нерген пален налын да вес пачерыш кусарен. Теле каникул годым рвезе-влак ече дене ялыш пӧртылыныт, кочкаш мо кӱлешым поген наҥгаеныт. Кокымшо курсышто Ермолайым армийыш служитлаш колтеныт. Тудо Канск оласе авиаций частьыш логалын. Бомбардировочный самолет дене чоҥештылаш, стрелок-радистлан туныктеныт. Парашют дене тӧршташат, ТУ, Ил-28 самолет дене чоҥешташат логалын. Шуко гана Врангель отрошто лийын. Вич ий авиацийыште служитлымеке, пед-училищыш тунемаш толын. Училищыште пырля тунемме Светлана Аскарова дене вашлияш тӱҥалын. Тунем лекмеке, коктынат Мишкан район Пекшек тӱҥалтыш школышто туныктеныт. Ик жап гыч Йошкар-Оласе кугыжаныш университетын биологий факультетышкыже заочно тунемаш пурен, дипломым налын. Пекшек ялыште у школымат чоҥаш пернен. Школ пелен пӧртым ыштеныт, вашке гыч кум ӱдырышт шочын. Кугуракше, Галя, ялозанлык техникумым тунем лектын. Роза Бирск пединститутын дошкольный факультетшым, Ирина ӱдырышт Йошкар-Олаште пединститутым тунем пытареныт. Ирина Медведево районышто туныкташ тӱҥалын. Кызыт кум ӱдыржат сулен налме канышыште улыт, уныка-влакым куштат.

Унам-влак дене Эльянысе Ленин уремыште педучилищын вержым ончен савырнышна, паркыш мийышна. «Илыме верда пешат сай», - палемдышт нуно. Шочшем-влак Радий Хабировын Уфа гыч колтымо саламлыме Правительственный телеграммыжым лудын лектыч. Районысо газетеш савыктыме саламлымашымат ончальыч. «Вуйлатыше-влак тыйым огыт мондо», - иктешлышт нуно. «Пашаште кузе кертынам, туге тыршенам», - вашештышым. Кызыт суртышто тошкештам, кевытыш миен толам. Кеҥежым пакчаште шогылтам. «Тендам огына мондо. Таза лийза, коклан толын кошташ тӱҥалына», - ӱшандарен чеверласышт унам-влак.

…Ермолай Ярмингинлан тений 90 ий темеш ыле. Но ӱмыржӧ кӱчык лие. Уныкаже-влак тудым ужын огытыл.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».