Шӧртньӧ сӱаным палемдат

50 ий ваш келшен да йӧратен илыше еш мужырым кеч-кунамат ончен куанет да пагалет. Мемнан ава-ачанат - Альбина Ильинична ден Реваль Павлович Васюткинмыт - пел курым пырля илат да ваш-ваш йӧратымышт, пагалымышт, икте-весылан ӱшанле улмышт дене шуко поро ойым суленыт.

Реваль ден Альбина коктынат Илиш районысо Анач ялеш шочын-кушкыныт, ик школыш тунемаш коштыныт, изинек келшеныт. 1968 ийыште ӱдыр рвезым Совет Армий радамыш ужатен. Самырык салтак тунамсе Куйбышев олаште Приволжский военный округысо танковый войскаште служитлен, кокла кугытан танк-влакын механик-водительышт лийын. Мӧҥгыжӧ сержант званий дене пӧртылын.

1971 ий 6 февральыште Реваль ден Альбина пеҥгыде тату ешым чумыреныт. Илышышт шке радамже дене воранен: 1971 ийыште икымше икшывышт, Анатолий, 1975 ийыште Алевтина, 1982 ийыште Виталина шочыныт. Тунам Реваль шӧр-товарный фермыште учетчиклан ыштен, Юматово ялозанлык техникумышто плановиклан тунемын. Тунем лекмек, тудым Илиш районысо «Заря коммунизма» колхозын плановикшылан шогалтеныт. Вара тӱҥ экономистлан, вич ий колхоз председательын кургым ямдылыме шотышто алмаштышыжлан ыштен. Калык тудым пагален.

Альбина ялысе библиотекым вуйлатен. Тунамак вате-марий коктынат Йошкар-Оласе Н. Крупская лӱмеш Марий кугыжаныш пединститутыш заочно тунемаш пуреныт. Вузым тунем лекмек, Анач школышто пашам ышташ тӱҥалыныт.

Чыла сай лийын, но трук ешыш ойго толын - 14 ияш эргышт илыш гыч вучыдымын каен. Ойгым чыташ куштылго лийын огыл. Васюткинмыт, ялысе суртыштым ужален, Нефтекамскыш илаш кусненыт, Касевышто шке сурт дене илаш тӱҥалыныт. Авана ачанан шӧртньӧ кидан улмыжлан куанен ситарен огыл.

Нефтекамскыште Реваль Павлович автосамосвал-влакым лукшо заводыш пашаш пурен, тушто 15 ий пашам ыштен. Вара тудым Корий кыдалаш школыш технологий туныктышылан ӱжыныт, идалык гыч школ директорлан шогалтеныт. Р.П. Васюткиным «БР образованийын отличникше» лӱм дене палемденыт. Альбина Ильинична пошкудо Кутлинка ялысе школышто ончыч туныктышылан, вара тӱҥалтыш школ вуйлатышылан ыштен. Вате-марий эше кок икшывылан - Андрей эргыштлан да Галина ӱдырыштлан - илышым пӧлекленыт.

Васюткинмытын чыла икшывышт кӱшыл шинчымашан улыт, кажныже шке специальностьшо дене пашам ышта. Кок ӱдырышт образований системыште тырша. Икшыве-влак шкештат ешан улыт. Пайрем годым чылан кугу ӱстел йыр чумыргат. Коча-кова ныл эрге да вич ӱдыр уныкаштым ончен кушташ полшат.

«Мемнан ачана-авана кугу пагалымашым да чапым суленыт. Ме нуным чот йӧратена да пагалена. Нунылан чылажланат кугу тау! Тыланда мланде марте вуйнам савена!» - ойлена ме, нунын икшывышт. Ожно арамлан огыл «Илышым илен эртараш - пасу гоч вончымо гай огыл» манын ойленыт. Васюткинмыт ешланат тӱрлӧ нелылыкым чыташ верештын гынат, чылажымат пырля сеҥеныт.

Ынде ачана-авана сулен налме канышыште улыт. Кеҥежым сад-пакчаште шогылтыт, пакчасаскам куштат. Ешым чумырымышт годсек эре кугу озанлыкым кученыт, шуко вольыкым: ушкалым, казам, комбым, чывым - ашненыт. Кызытат вольыкышт уло. Эше емыжым, поҥгым погаш кошташ йӧратат. Чылажымат пырля, коктын ыштат.

Суртыштышт эреак поро шӱлыш озалана. Унала миет веле, ӱстелыш сийым погаш тӱҥалыт. Нунын дене кеч-могай йодышым каҥашаш лиеш. Ийготым погеныт гынат, тугаяк кумылзак, мутланаш йӧратыше улыт.

Шӧртньӧ сӱан марте шӧртньӧ чонан да ушан еҥ-влак гына илен шуыт, маныт. Витле ий - кужу пагыт, но тудат пеш писын эртен кайымыла чучеш. Ешлан шуко тӱрлӧ савыртыш гоч эрташ логалын гынат, эн волгыдо шарнымаш гына ушеш кодын. Йӧратымаш да ӱшанле улмаш шӧртньӧ юбиляр-влакын еш илышыштышт эн пеҥгыде негыз лийын.

Еш архив гыч налме фото.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».