Поро шомак тек чондам ырыкта

Ачаже, мемнан Ишимбай кочана, Кугу Ачамланде сар гыч пӧртылын огыл. Тыге Сания ӱдыржӧ ден Рим эргыже ача, Гульсум ватыже пелаш деч посна кодыныт (Сар годсо шужен ий-влакым авам кызытат шарна.).

Кандашияш школ деч вара авам тасмам шуледаш да ургаш туныктымо курсым пытарен. 1963 ийыште Белебей район Баймырза ял гыч Ахметгарей Миннибаев дене пырля ешым чумырен. Авам-ачам ӱмыр мучко колхозышто тыршеныт. Авам ушкалым, презым ончен, осеменаторлан ыштен, ачам кӱтӱчӧ лийын. Чумыр паша стажышт нылле утла ийыш погына. Ермолкино ял поселенийыште эртарыме «Селасе эн сай кудывече» конкурсышто сеҥымылан, ял илышыште чолгалыкым ончыктымылан ятыр Чап грамот ден дипломышт уло. Авам тӱвыра сомылышкат чолган ушнен. Баймырза ялысе марий фольклор коллектив художественный самодеятельность смотрлаште чӱчкыдын ончыл верлам наледен.

Авам ден ачам витле куд ий келшен илат, кум икшывым ончен куштеныт. Нуно чылан ешаҥыныт, илышыште шке верым муыныт. Мый, Зоя ӱдырышт, Башкортостан Республикысе образованийын отличникше улам, «Российын эн сай туныктышыжо-влак» конкурсышто сеҥышыш лектынам. Кызыт илышем бизнес паша дене кылденам. Пашам, чыным йӧратымаш, ответственный лияш тыршымаш - чыла тиде авана-ачана деч куснышо койыш-шоктыш. Кокымшо икшывышт, Алексей шольым, Баймырза ялыштак ила, кресаньык-фермер озанлыкым вуйлата, ялын старостыжо улеш, мӱкшым онча. Эдуард шольына Нефтяной университет деч вара Йӱдвелыште пашам ыштен. Кызыт ешыж дене Москваште ила. Сания ден Ахметгарейым тукымым шуйышо куд уныка куандара.

Авамлан шукерте огыл кандашле ий теме! Тек авана-ачана, таза, кужу ӱмыран лийын, ончыкыжат куанен илат. А ме нунылан эҥертыш лияш тыршена.