Конкурс еш кылым чотрак вияҥда

Тиде шкешотан конкурсыш оласе 16 еш ушныш. Икымше кечын команда-влак «MEGA JUMP» батут рӱдерыште, оласе краеведческий музейыште, 11-ше школысо тирыште да «Людовик» ресторанысе чаракан полосалаште вийыштым тергышт. Кокымшо кечынже «Урал» МФК шке деранже погыш. Эн ондак таҥасымаш бассейныште тӱҥале, вара тусо клубышто шуйныш: караоке почеш мурымаш, интеллектуал, куштымаш конкурс-влак чылаштын кумылым кӱшкӧ нӧлтальыч. Финалже Самырык-влакын полатыштышт лие.

Тушто кажне еш шкенжын талантшым ончыктыш: мурышт, куштышт, сценкым шындышт - икманаш, чылажат оҥай да весела ыле. Тидын деч посна болельщик-влакат кажне этапым пырля эртышт. Нуно икымше кечын шагалрак лийыныт гын, кокымшо да кумшо кечылаште шукын погыненыт, садлан участник-шамыч кугу эҥертышым шижыныт.

Р. Никоновын фотожо

Тӱрлӧ калык гыч улшо еш-влак коклаште поро юж шижалтын. Руш, татар, башкир, армян еш-влак дене пырля конкурсышто Маникаевмыт да Филатовмыт марий еш-влакат вийыштым тергышт. Икымше кечын икте-весе дене палыме гына лийылтын гын, моло кечылаште йолташ семын лийме. Пайрем шарнаш кодмо лӱмеш фото да пӧлек-влак дене мучашлалте. Пӧлек шотышто спонсор-шамыч полшеныт, сандене кажне еш могай-гынат номинацийыште сеҥышыш лектын. Тиде пайрем кажне ешлан сай шарнымашым кода, очыни, молан манаш гын тыште тӱҥжӧ - йоча-влакын шке ача-авашт дене пырля, ваш келшен, тӱрлӧ вере пырля вийыштым тергымышт. А керек-могай йочалан - тиде кугу куан. Тек умбакыжат тыгай конкурс-пайрем-влак эре лийын шогат да еш кылым эше чотрак вияҥдат.