Кажне икшывылан кӱлешан шомакым муман

Конкурсыш Благовещенск ола гыч Аптыкаевмыт, Нефтекамск ола гыч Ибрашевмыт марий еш-влакат ушненыт. Таче лудшо-влакым Аптыкаевмыт еш дене лишкырак палымым ыштынена.

Ирина да Владислав Аптыкаевмытын ешым чумырымыштлан тений идалык мучаште 28 ий лиеш. Тӱжвал сын-куным ончалын, нунын нерген ийготым погышо улыт манын шоналташат огеш лий. Кушкын шогалше ныл мотор эргыштым ужын гына изишак тогдаяш тӧчет.

«Вате-марий - мужыр оҥгыр» маныт. Мишкан район Ардаш ялеш шочын-кушшо Владислав ден Нуриман район Педий ялын шочшыжо Ирина илышыште йыгыре, таҥ ошкылыт, икой дене, икгай шонымаш дене илат. Тӱрлӧ мероприятийыш ушнаш огыт ӧркане, огыт ӧр, икшывыштымат шуко вере вийым тергаш таратен да кумылаҥден моштат.

Ӱмыргорныштын южо татшым конкурслан ямдылыме видеоклипыштат ужаш лиеш. Мо шарнем, Ирина ден Владислав самырыкнек икшывышт дене пырля еш конкурслашке, спорт таҥасымашлашке коштыт ыле, чӱчкыдын сеҥышышкат лектыныт. «Мыйын ешем - мыйын поянлыкем» конкурсышто кум гана, «Самырык еш» конкурсышто, «Ачай, авай да мый - спортым йӧратыше еш» таҥасымаште кум гана вийым тергеныт, «Ший кандыра» фестивальыште, «Шокталте, шокталте» конкурсышто ятыр гана мастарлыкым ончыктеныт. Кызытше вачӱмбак эше вес сомылым «пыштеныт» - Владиславлан Благовещенск оласе тӱвыра рӱдер пелен чумырымо «Оҥгырйӱк» марий фольклор ансамбльым вуйлаташ ӱшаненыт. Пелашыже, мутат уке, ӱшанле эҥертыш да полышкалыше улеш.

Владислав Ильич жапыштыже Афган сарым эртен, кызыт «Роснефтьыште» 27-ше пожарный частьыште пожарныйлан тырша. Ирина Валентиновна «Уфанефтехимыште» пашам ышта, яра жапыштыже скандинавский ошкылмаш дене тренер семын опытым пога, путешествийыш кошташ, кочкыш-йӱышым ямдылаш, кидпашам ыштылаш йӧрата.

Игорь эргыштат - творческий шӱлышан рвезе. Тудо профессионально фотографироватла, видеоклипым сниматла, сценылык але заказ почешат вургемым урген пуэн кертеш, «Три метра» оласе КВН командыште модеш, ик жап «Вираджамп» ансамбльыште хореографын полышкалышыже лийын.

Юрий эргышт спортлан шӱман. Благовещенскысе шуко профилян колледжыште тунемме годым спортын тӱрлӧ видше дене заниматлен. «Солнышко» ансамбльыште куштен, КВН командыште модын.

Илья эргышт оласе 4-ше школышто луымшо классыште тунемеш, оласе «Арматура» баскетбол командыште модеш.

Эн изишт, Владимир, але икымше классыште веле тунемеш, но изаже-влак гаяк баскетбол дене модеш, «Вираджамп» ансамбльыште кушта, ача-аваже пелен «Оҥгырйӱк» ансамбльыште марий тӱвыралан шӱмаҥеш.

Еш - чылалан негыз: икшыве тышеч «вожым налеш», илышлан тунемеш, вийым пога. Ирина Валентиновна ден Владислав Ильич тидым сайын умылат да икшывыштлан шукырак жапым ойыраш, кажныжлан кӱлешан шомакым муаш, чын корным верешташ полшаш тыршат, сеҥымашыштлан куанат, икте-весым пагален да ваш-ваш эҥертен илаш туныктат.

Э. АПТУЛМАНОВА.