Таза ешыште эре куан

2018-ше ийым Башкортостаныште Еш идалык семын увертарыме. Еш - тиде илыш поянлык. Арамлан огыл калыкмут ойла: «Тичмаш еш киндерке дене иктак». Вет келшен илыше, таза ешыште кажне айдеме шкем ласкан, пиалан улмыжым шижеш. Тату ешыште пашажат ушна, нелылыкшат куштылгынрак сеҥалтеш. Тыгай келшен илыше, тыгак шуко икшыван, поро пашаж дене але эше вес семын сай могырым ойыртемалтше еш кажне ялыште, селаште уло. Можыч родо-шочшыда, палымыда-влак коклаште улыт кугешнен кертшаш еш-влак? Але пошкудышто илыше еш сай койыш-шоктышыж дене ойыртемалтеш?

А эше кажне ешын шке йӱлаже (традицийже) уло. Пайремым рӱж погынен эртараш йӧратеда? Икшыве, уныкада-влак дене ешге пӱртӱсыш чӱчкыдын лектыда? Спорт дене пеҥгыде кылым кучышо еш-влакат улыт, очыни… Можыч ешыштыда лийше оҥай, но шонкалаш таратыше иктаж томаша сай шарнымашым коден. Чыла тидын нерген редакцийыш возен колтен кертыда. Эн оҥайжым идалык мучко «Таза ешыште эре куан» рубрикышке пуртена.

Серышдам почто дене але [email protected] электрон адресыш колтыман. Кӧ, кушеч улмыдам ончыкташ ида мондо.