Еш - илышын рӱдыжӧ

Александра Мустафиновна Нефтекамск оласе 91-ше профессиональный училищыште математикым туныктышылан ышта. Тудлан тыгай мастарлыкым пӱртӱсак пуэн докан: икшыве-влакым йӧрата, кажне тунемшыже верч тургыжлана, кӱлеш годым нунылан полшаш тырша. Паша стажше 25 ийыш погынен. Профессиональный училищын коллективыштыже тудым пагалат да аклат.

Пелашыже, Петр Ипаевич Пекин, - пеш тыматле да пашаче пӧръеҥ, 29 ий нефтяной промышленностьыште тыршен, паша ветеран улеш. Ты пашаж гычак сулен налме канышыш лектын. Но яра шинчылташ огеш йӧрате, Николо-Березовкысо пакчазе-влакын «Росинка» ушемыштым вуйлата. А тыгеже тудын нерген уста чоҥышо, коҥга оптышо, столяр, пакчазе манашат келша - кидше чылалан толеш.

Вате-марийын ӱшанышт, куанышт, илышыштын пеледышыже - 13 ияш Даша ӱдырышт. Кызыт Нефтекамск оласе 10-шо школышто тунемше талантан ӱдыр изинек шуаралт кушкын. «Миллениумышто» кушташ тӱҥалмыж годым ныл ият ныл тылзаш веле улмаш, икымше класс гыч Йоча спорт школышто фитнес-аэробика дене заниматлаш тӱҥалын. Ача-аважын полышыштлан эҥертен, шкежат чот тыршен тренироватлалтын, Дарья Пекина Нефтекамск оласе «Инфинити» команда дене пырля чапле кӱкшытыш шуын. Тренерышт Т.Д. Бутусова дене пырля оланан да республикынан гына огыл, элын чапшым тӱнямбал кӱкшытыштат аралат, вет командыштым фитнес-аэробика дене Российын сборныйышкыжо пуртеныт. Теве кодший майыште Чехийыште Карловы Вары олаште Европын первенствыштыже 14-16 ияш-влак коклаште кокымшо да 10-14 ияш-влак коклаште кумшо лийыныт. Октябрь тылзыште Нидерландыште Лейден олаште тӱнямбал чемпионатыште кумшо верым сеҥен налыныт. Тулеч вара оласе Строитель-влак уремеш нунын фотографийышт дене кугу баннерым вераҥденыт. Каласаш кӱлеш, кодший Д. Пекина спорт мастерыш кандидат нормативым темен.

Спортышто ойыртемалташ, могай-гынат результатыш шуаш манын, шкем эре кышкарыште кучыман. Т. Д. Бутусова шкеж дечат, воспитанникше-влак дечат пеҥгыдын йодеш. Ӱдыр-влак южгодым кечеш 12-13 шагат денат тыршат, кочкыш-йӱыш шотышто чыла шӱдымым шуктат.

Талантан айдеме-влак чыла шотыштат талантан лийыт, маныт. Александра Мустафиновна ден Петр Ипаевичын ешышт нергенат тыгак каласыме да ончыкыжат нунылан чыла сайым тыланыме шуэш.

С. ИСАКОВА.

Снимкыште: Дашалан ача-ава пелен ласка.