Ачам нерген поро шомакым каласынем

Кочам, Альмакай Аптыкаевич Аптыкаев, 1889-ше ийыште Мишкан районысо Тӧргымдӱр ялеш шочын, Сакиба кувавамже - 1902-шо ийыште. Альмакай кочам да Аплакай изаже коктын иленыт, молан манаш гын нунын авашт ден ачашт изирак улмышт годымак илыш дене чеверласеныт. Альмакай ден Аплакай коктынат Граждан сарыште кучедалыныт. Кочамын ик кидшым пуля эмгатен, садлан кӧра тӱрлӧ пашам ик кидше дене гына ыштылын. Аплакай изаже колхозым чоҥаш полшен. Тудлан шке жапыштыже Крупская лӱмеш колхоз председательын пашажым ӱшаненыт. А ялысе поянет-влак, погынен, тудым правлений пӧртеш лӱен пуштыныт. Мут толмашеш, варарак, 1932-шо ийыште, тудо Аптыкаев лӱмеш колхозыш савырнен. Тушко Андреевка, Монар да Корак ял-влак пуреныт. Альмакай кочамын кум икшывыже лийын - Изикай, Алексей да Зоя. Мый, Алексейын эргыже, ачам нерген мутым шуйынем.

Ачам ден авам ныл икшывым - Иринам, Викторым, Раисам, Игорьым - йол ӱмбак шогалтеныт. Тудо ныл классым ялыште тунемын, 5-ше классыш Чорай школыш коштын. Умбакыже тунемын огыл, пашам ышташ кӱлын - ушкал дене тырмален, имньым кӱтен. 1945-ше ийыште Караидель районысо чодырам руымаште тыршен. Вара тудым трактористлан тунемаш колтеныт. 1950-ше ийыште ХТЗ тракторым пуэныт, а 1951-ше ийыште ДТ-54 тракторым виктараш туныктымо курсыш да тудо ийыштак МТС гыч Рефанда совхозыш сӧреман мландым куралаш колтеныт. Сай пашаеҥ семын ачамлан Бирск оласе бригадир-влак курсыштат тунемаш темленыт. Тыге ачам илыш корныштыжо бригадирланат ыштен, Мишкан районысо Аптыкаев лӱмеш колхозышто механикын сомылжымат шуктен. Икманаш, ӱмыржӧ мучко ял пашаште тыршен, колхозым нӧлтымӧ сомылыш шагал огыл вийым пыштен. Пашам сайын, тыршен ыштымыжлан «За освоение целины» медаль дене палемденыт.

Ешаҥашат жап шуын. Пелашыжлан пошкудо Тӧргымдӱр ял гыч Ольга Игнаевам ойырен. 1956-шо ий 23 февральыште нуно, ӱмыреш пырля лияш товатлен, ешым чоҥеныт. Тачысе кечын авам ден ачам сулен налме канышыште улыт. Нефтекамск олаште ӱмырыштым шуят. Поро ава-ача веле огыл, эше пиалан кова-коча улыт - нуным лу уныка да вич кугезе уныка куандарат. Тиде арнян, 23 февраль кечын, ачам ден авамын икте-весылан эҥертен илымыштлан 62 ий темеш. Икшывышт, родо-шочшышт нуным жаплат, пагалат. Тек келшен илыше мужыр умбакыжат таза лиеш, кажне кечылан куанен, кужу ӱмырым илен эртара.

В. АЛЬМАКАЕВ.

Снимкыште: Ольга ден Алексей Альмакаевмыт Владислав кугезе уныкашт дене.