Изумруд сӱаным пайремлышт

Мыйын ковам ден кочам Калтаса районысо сылне Павасолаште илат. Кочам, Роман Шаймарданович Шаймарданов, тышанак шочын да ӱмыржӧ мучко шочмо ялыштыже илен. Нефтекамск олаште НЭС-ыште, Калтаса селаште «Сельхозэнерго» организацийыште пашам ыштен. Тудым шуко еҥ пала да пагала. Совет Армийыште служитлымыж годым коммунист партий радамыш пурен да кызыт мартеат тиде пашажым шуктен шога. Кызытат тугаяк рвезе, чулым, патыр пагытше лиеш гын, мыят тудын дене пырля илышнам чын корныш виктараш полшем ыле, шонем.

А ковамже, чевер да весела марий ӱдыр, Таныптӱр воктенсе ямле Васолаш шочын-кушкын. Когыньнан лӱмнат кужунжо Идусия лиеш, но мыйым кӱчыкын Аида, ковамым рушлаже Дуся, марлаже Меҥай маныт. Ковам музиканым шокталта да порсын гай йӱкшӧ дене муралта. Мый фортепианом шоктем.

Тыгай весела, поро, ныжыл да йӧратыме ковам ден кочамын ешым чумырымыштлан 20 январьыште 55 ий теме - изумруд сӱаным пайремлышт. Вич ий ончыч мыйын изам нунын шӧртньӧ сӱаныштлан пеш мотор ойлымашым возен ыле, а ынде мыят кугем шуым да поро шомакем каласынем. Кова-кочанан кӧгӧрчен гай вычыматыл, йӧратен да келшен илымышт - мыланна пример. Нуно ӱмырышт мучко родо-шочшо, йыр пошкудо да йолташ-влак дене пырля ваш-ваш кылым кучен илат. Нунын деке мӱндыр верла да пошкудо ялла гыч уна-влак толеденак шогат. Ойласат марлат, рушлат, татарлат, сандене меат, олаште шочын-кушкынна гынат, ныл йылмым палена. Авам мылам эре ойла: «Шочмо йылме деч вожылман огыл, палыман да ойласыман. Шке родо-шочшет деч торлыман огыл - пырля келшен илыман. Шочшо - эн лишыл еҥ. Илышыште кеч-могай йӧсылыкым вашлият гынат, шочшет кидым шуялта». Ковам ден кочамат вич икшывым ончен куштеныт да тыгай сугынь денак туныктеныт. Нуно пайремымат, чылан чумырген, рӱжге пайремлат, пашаштат пырля улыт. Мылам тыгай поро да сай авам, павайым да кокам-влакым ончен куштымыштлан йӧратыме ковам ден кочамлан пеш кугу таум ойлем. Тек пиалан, кужу ӱмыран да эре тыгаяк весела, чулым кумылан лийыт. Вет Роман кочайын да Меҥай ковайын илышышт мемнан чонышто пеш виян кугешныме кумылым ылыжта. Ме нуным чот йӧратена.

Аида ИБРАШЕВА,

Снимкыште: 55 ий ваш келшен илыше Меҥай да Роман Шаймардановмыт.