Ош кечыже легылда

Ош кечыже легылда, 

                                  легылда,

Огеш вучо нигӧмат - 

                                шинчылда.

Меже тышке унала вел толна,

Айста пырля илена чыланат. 

Рвезе ӱмыр эрталеш, эрталеш

Ондалалтын йогышо ший 

                                     кол гай.

Изи шӱмем тыйым чот кычалеш,

Огеш му да южгунам 

                             шортеш чай.

Самоварым шындымек вучалам,

Шарналтет да толылдет дыр, 

                                      шонем.

Ӱмыремже эрталеш да шортам,

Рыскалемже укелан муҥаен.

Ала уло мемнанат рыскална,

Ала толыт унала, сагынен?

Ала уло илышаш кечына?

Эрталалже ӱмырна, сайрашен.

* * *

Жапыште нимо огеш лий,

Шуко вучымаш арам.

Кӧм вучет - вашкен огеш тол,

Ометшат йомеш коклан.

Ӧпкелет гынат южгодым,

Вашешташ мут ок муалт.

Ойго керылтмеке чоныш,

Шылын от керт нигуштат.

Йӧратет уш кайымешке -

Уке мелынлык вашеш.

Кӱлешлан пелештынет да -

Ок саламле ваштареш.

Жапыште нимо огеш лий,

Лач огеш тол чылажат.

Южгунам У ийлан леве,

Лум лиеш вет шошымат.

Эх, пиал тунаре нечке,

Вучымо улеш узак.

Чурикак толеш гын веле

Вучыдымо жапыштак?

Йӧратымаште - сакче вий

Кугу олан покшелныже,

Йошкар-Олан покшелныже

Пелйӱд лишан пычкемыш йӱд,

Пычкемыш, йӱштӧ, йӧнсыр йӱд.

Кычал коштам, кычал толам,

Кычал коштам, кычал толам.

Пиалым йӱдым кычалам.

Каласе, кушто тый улат?

Ӱпетын тамжым мый шижнем.

Ӱпетым ныжылгым шижнем.

Да ӧндалнем шӱмем пелен,

Ласкан капет деке пызнен.

Арале мыйым шкетлык деч,

Утаре мыйым шкетлык деч,

Шу йӱдым тулым ылыжте,

Пӧршаҥше йӱштӧ левыже.

Ший шӱдыр кӱшнӧ йӱлалеш.

Мемнан шӱмнаже кыралеш,

Мемнан шӱмнаже ыралеш

Йӧратымашын сай шокшеш.